სახელმწიფო უსაფრთხოების სამსახურის (სუს) საინფორმაციო-ანალიტიკური დეპარტამენტის დირექტორის მოადგილის, ირაკლი ანთაძის განცხადებით, განიძილება შესაძლებლობა, რომ ოკუპირებული ცხინვალის ციხეში უკანონო პატიმრობაში მყოფი ზაზა გახელაძე ოჯახმა მოინახულოს. ამის შესაძებ ირაკლი ანთაძემ დღეს, 15 ივნისს გორის მუნიციპალიტეტის სოფელ ერგნეთში ინციდენტების პრევენციისა და მათზე რეაგირების მექანიზმის (IPRM) მორიგი შეხვედრის დასრულების შემდეგ ჟურნალისტებთან განაცხადა.

"საკითხი დაისვა ძალიან პრინციპულად. იყო შემდგომ კონსულტაციები და ამ ეტაპზე შეგვიძლია გითხრათ, რომ ეს კონსულტაციები გრძელდება. გარდა ამისა, განვიხილეთ შესაძლებლობა რომ მოხერხდეს ოჯახის წევრების ვიზიტი ცხინვალში ზაზა გახელაძის მოსანახულებლად და იმედი მაქვს, რომ უახლოეს მომავალში ეს თარიღი ცნობილი გახდება", — განაცხადა ანთაძემ.

15 ივნისს ერგნეთში IPRM-ის რიგით მე-100 შეხვედრა გაიმართა. შეხვედრას საქართველოში ვიზიტით მყოფი ევროპის უსაფრთხოების და თანამშრომლობის ორგანიზაციის (ეუთო) გენერალური მდივანი, ჰელგა მარია შმიდი მონაწილეობდა.

სუს-ის თანახმად, განხილვის ერთ-ერთ მთავარ თემას ბოლო პერიოდში გააქტიურებული უკანონო ე.წ. ბორდერიზაციის პროცესი წარმოადგენდა.

საოკუპაციო რეჟიმის მიერ დაკავებული ზაზა გახელაძის მამა, მიხეილ გახელაძე ამბობს, რომ შვილის დაბადების დღეზე, 23 ივნისს ცხინვალში გადასვლას აპირებს. გახელაძის ოჯახი აქციის მოწყობასაც გეგმავს.

11 ივლისს ერთი წელი გავა მას შემდეგ, რაც ზაზა გახელაძე რუსმა სამხედროებმა დაატყვევეს. ის კასპში ჯერ ცეცხლსასროლი იარაღით დაჭრეს, შემდეგ კი გაიტაცეს. რუსული მხარის მტკიცებით, გახელაძემ ცეცხლი პირველმა გახსნა. თუმცა, რადიო თავისუფლების ინფორმაციით, სასამართლო პროცესზე ერთ-ერთმა მოწმემ თქვა, რომ ზაზა გახელაძეს დამიზნებით არ უსვრია.

გახელაძეს დე ფაქტო ხელისუფლებამ ბრალი წაუყენა რუსეთის სისხლის სამართლის კოდექსის ორი მუხლით — "სიცოცხლის ხელყოფის მცდელობა" და "სახელმწიფო საზღვრის უკანონოდ გადაკვეთა".

ოკუპირებული ცხინვალის ე.წ. სასამართლომ მას 5 თებერვალს 12 წლითა და 6 თვით უკანონო პატიმრობა მიუსაჯა.

გაიგეთ მეტი: