76 წლის ინდოელი კაცი, რომელიც ხშირად მსოფლიოში ყველაზე დიდი ოჯახის შემქმნელად მიიჩნეოდა, გარდაიცვალა.

ჯიონა ჩანა რელიგიური სექტის ხელმძღვანელი იყო, სადაც პოლიგამია (ერთდროულად რამდენიმე ადამიანზე ქორწინება) დასაშვებ პრაქტიკად ითვლება: მას 38 ცოლი, 89 შვილი და 36 შვილიშვილი ჰყავდა.

BBC-ის ინფორმაციით, ამის გამო მას ადგილობრივი მედია ხშირად "მსოფლიო რეკორდსმენს" უწოდებდა, თუმცა დანამდვილებით რთულია იმის თქმა, მართლა ასე იყო თუ არა, რადგან ოფიციალურად ეს არავის გადაუმოწმებია და ასევე სხვა პირებიც გამოთქვამენ ანალოგიურ პრეტენზიას, რომ ყველაზე დიდი ოჯახი ჰყავთ.

ჯიონა ჩანას ოჯახი არის თუ არა მსოფლიოში უდიდესი, შეიძლება, ბუნდოვანია, მაგრამ უზარმაზარი რომაა, ეს ცხადია: მთელი ოჯახი მრავალბინიან სახლში ცხოვრობს, რომელსაც 100 ოთახი აქვს. გავრცელებული ინფორმაციით, ჩანას ცოლები საერთო საძინებელში ცხოვრობდნენ.

ჯიონა ჩანას სახლი ხშირად იქცევდა ტურისტების ყურადღებას.

ფოტო: GETTY IMAGES

ოჯახი ქრისტიანული სექტის ნაწილია, რომელსაც დაახლოებით 2 000 მიმდევარი ჰყავს და ყველა ჯიონა ჩანას სახლის მიმდებარე ტერიტორიაზე ცხოვრობს. სექტა, რომელიც მხოლოდ კაცებს აძლევს პოლიგამიის უფლებას, 1942 წელს ჩანას ბაბუამ დააარსა.