დაღესტანში პოლიციამ ძალადობის მსხვერპლთა თავშესაფარში დააკავა ჩეჩენი ქალი, რომელიც ქვეყნიდან ოჯახში ძალადობისა და მუქარის გამო გამოიქცა. DW რუსეთის ლგბტ ორგანიზაციაზე დაყრდნობით წერს, რომ ხალიმატ ტარამოვა დაკავების შემდეგ იძულებით დააბრუნეს ჩეჩნეთში, სადაც მას ორიენტაციის გამო დევნიდნენ.

გამოცემას თვითმხილველები უყვებიან, რომ თავშესაფარში პოლიცია ქალის დასაკითხად მივიდა, რის შემდეგაც ტერიტორია დატოვა, თუმცა მალევე სამართალდამცავებთან ერთად დაბრუნდა. მათი ინფორმაციით, შენობიდან ძალით გაათრიეს რამდენიმე პირი და სახლში მყოფები დაკითხვაზე წაიყვანეს, ხალიმატ ტარამოვა კი სხვა მანქანაში ჩასვეს.

ტარამოვას შეყვარებული ამბობს, რომ რეიდისას თავშესაფარში ხალიმატის მამაც იმყოფებოდა, ის შენიშნეს, თუმცა აივნიდან გაქცევა მოახერხეს. მისი თქმით, უცნობმა პირმა დახმარება შესთავაზა და პოლიციის განყოფილებაში იმყოფებოდნენ, სადაც გაყვანას დაპირდნენ, თუმცა გარეთ გამოსულებს კადიროვის მხარდამჭერები დახვდათ და ტარამოვა იძულებით ჩასვეს მანქანაში. ამბობს, რომ დახმარება ვერ შეძლო, რადგან ის დაჭერილი ყავდათ.

რადიო თავისუფლების კავკასიის ბიურო წერს, რომ ხალიმატ ტარამოვა ჩეჩნეთის ლიდერთან. რამზან კადიროვთან დაახლოებული ბიზნესმენის შვილია და დაღესტანის პოლიციასთან ერთად დაკავებაში კადიროვის ხალხიც იყო ჩართული.

დაკავებამდე ტარამოვა ყვებოდა, რომ ჩეჩნეთში მასზე ძალადობდნენ მშობლები და ქმარი. მისი თქმით, 5 წელია ქორწინებაშია და არაერთხელ უნდოდა განქორწინება, თუმცა მშობლების უფლებას არ აძლევდნენ. მისივე თქმით, ქმარიც და მშობლებიც ემუქრებოდნენ, რომ თუ გაქცევას გაბედავდა, იპოვიდნენ და მოკლავდნენ.

6 ივნისს მან ვიდეომიმართვაც გაავრცელა, სადაც ამბობდა, რომ სახლიდან თავისი სურვილით გამოიქცა ძალადობის გამო. მან ითხოვა, რომ ძებნა არ დაეწყოთ და ადგილსამყოფელზე ინფორმაცია არ გაეცათ, რადგან ეს მის სიცოცხლის საფრთხეს შეუქმნიდა.