საქართველოს პრემიერ-მინისტრი, გიორგი კვირიკაშვილი მიიჩნევს, რომ საქართველოსთვის უვიზო მიმოსვლის შემოღება ნიშნავს ევროკავშირის მხრიდან საქართველოსთვის და ხელისუფლებისთვის ნდობის გამოცხადებას. ამის შესახებ კვირიკაშვილმა უვიზო მიმოსვლის შემოღებასთან დაკავშირებულ რეგულაციას და განახლებულ შეჩერების მექანიზმის ხელმოწერის შემდეგ განაცხადა.

"ეს არის უმნიშვნელოვანესი გადაწყვეტილება, რომელიც არის პოლიტიკური მხარდაჭერის გამოხატულება ევროკავშირის მხრიდან საქართველოსთვის. დღეს ევროკავშირის კარი გაიღო საქართველოსთვის, საქართველოს მოხელეებისთვის და ეს უკვე აღარაა პირველი ნაბიჯები ევროინტეგრაციის კუთხით, ეს არის მნიშვნელოვანი მიღწევა ევროკავშირთან ინტეგრაციის კუთხით," - აღნიშნა კვირიკაშვილმა და თქვა, რომ საქართველომ უნდა გააგრძელოს რეფორმები და გახდეს ევროპული ოჯახის წევრი.

უვიზო მიმოსვლის შემოღებასთან დაკავშირებულ რეგულაციას და განახლებულ შეჩერების მექანიზმის ხელი დაახლოებით ერთი საათის წინ მოეწერა.