უკვე 20 წელი გავიდა მას შემდეგ, რაც ბეჭდების მბრძანებლის ტრილოგიის პირველი ფილმი ვიხილეთ და ტოლკინის სამყარო მთელი გულით შევიყვარეთ. ბეჭდების მბრძანებლისა და ანიმაციის გულშემატკივართა სასიხარულოდ, ამჯერად მონატრებული სამყაროს კიდევ ერთ ისტორიას ანიმეს სახით ვიხილავთ.

ანიმე ფილმი, სახელად The Lord of the Rings: The War of the Rohirrim ჰელმის ხრამის, როჰანის მეცხრე მეფისა და იმ ომის ისტორიას გვიყვება, რომელმაც შუახმელეთი სამუდამოდ შეცვალა. ახალ ანიმეში სიუჟეტი ტრილოგიის მოვლენებამდე რამდენიმე ასეული წლით ადრე ვითარდება.

New Line Cinema-სა და Warner Bros. Animation-ის ანიმეზე რეჟისორი კენჯი კამიამა იმუშავებს, რომლის სახელსაც საკულტო ანიმე Ghost in the Shell: Stand Alone Complex და Blade Runner: Black Lotus უკავშირდება. ანიმეს სცენარზე ჯეფრი ედისი და უილ მეთიუსი იმუშავებენ, რომლებმაც სერიალი The Dark Crystal: Age of Resistance შექმნეს. აღსანიშნავია, რომ ახალ გუნდს კონსულტაციებს The Lord of the Rings: The Return of the King-ის ოსკაროსანი სცენარის ავტორი ფილიპა ბოიენსი გაუწევს.

"New Line-ის გუნდი ჯ.რ.რ. ტოლკინის სამყაროსთან საოცარ სიახლოვეს გრძნობეს, შესაბამისად, შუახმელეთში Warner Bros. Animation-თან ერთად დაბრუნება ნამდვილად ახდენილ ოცნებას ჰგავს", — აცხადებს New Line Cinema-ს პრეზიდენტი რიჩარდ ბრენერი.

შეგახსენებთ, რომ ბეჭდების მბრძანებლისა და ჰობიტის ტრილოგიების ჯამური შემოსავალი 6 მილიარდს აღწევს, Return of the King-ს კი 11 ოსკარი აქვს მიღებული. გაიზიარებს თუ არა ამ წარმატებას ტოლკინის სამყაროს მიხედვით შექმნილი ახალი ანიმე, ამას მხოლოდ დრო გვიჩვენებს.