ყოფილი პრემიერმინისტრისა და პარტია საქართველოსთვის ლიდერის, გიორგი გახარიას განცხადებით, ქართული ოცნების ყოფილი თავმჯდომარის, ბიძინა ივანიშვილის წერილი მისთვის "ტონალობით იყო აბსოლუტურად" მიუღებელი. გახარიას თქმით, განცხადებაში ერთი სიმართლე იყო, რომ "გიორგი გახარია ბიძინა ივანიშვილის პროექტი არ არის". ამის შესახებ მან TV პირველის ეთერში ისაუბრა.

"მე ვფიქრობ, ეს იყო, რამაც ბიძინა ივანიშვილი აიძულა მსგავსი მძაფრი განცხადებით გამოსულიყო, ეს ერთი. მეორე — ეს განცხადება ჩემთვის, მისი ტონალობით იყო აბსოლუტურად მოულოდნელი. ამ განცხადებაშია ორი საკითხი — გახარია ჩემი პროექტი არ არის და გახარია არის მოღალატე. ფსიქოლოგიურად ძალზედ სწორად დალაგებული განცხადება, სადაც არის ერთი სიმართლე, რომ გიორგი გახარია არ არის ბიძინა ივანიშვილის პროექტი და ვერ იქნება ბიძინა ივანიშვილის პროექტი. მეორე არის ტყუილი, რომ ვითომ ჩვენი წარმომადგენლები ავრცელებენ ხმებს, რომ ჩვენ ვართ ოცნება 2, რაც აბსოლუტურად არ შეესაბამება სიმართლეს, ჩვეულებრივი ტყუილია. ამასთან ერთად, მორალურად ჩაფენილია, რომ გიორგი გახარიამ უღალატა სახელმწიფოს და გუნდს, სხვა ყველაფერი იქ არის წყალი", — თქვა მან.

გახარიას თქმით, ეს განცხადება, შექმნილია პირველ რიგში იმისთვის, რომ პოლიტიკურ ველზე ჰქონდეს ზეგავლენა. მისი განცხადებით, ქართული ოცნების თავმჯდომარე, ირაკლი კობახიძე 2 დღით ადრე გამოვიდა და "რაღაც ბოდვები ილაპარაკა", რათა შემდეგ ივანიშვილის "ავტორიტეტს უფრო გაპრავებულად" დაერქვა ღალატი იმისთვის, რაც მისთვის "სახელმწიფო ინტერესების სმახურებაა".

"მაგრამ იქიდან გამომდინარე, რომ სიმართლის ნაწილში მე ვადასტურებ, რომ ჩვენ არ ვართ, ვერ ვიქნებით და არ ვიქნებით ქართული ოცნება 2, რა თქმა უნდა, ტყუილია ის, რომ ვინმე ავრცელებს ხმას. რა თქმა უნდა, ჩემთვის მიუღებელია ის ფორმები, რითაც ყველანაირი დასაბუთების გარეშე და დასაბუთება მხოლოდ არის ის, რომ 2 დღით ადრე პარტიის დღევანდელი თავმჯდომარე გამოვიდა, რაღაც ბოდვები ილაპარაკა და ეს იყო ჩაფენილი იმისთვის, რომ შემდგომ ბიძინა ივანიშვილის ავტორიტეტს უფრო გაპრავებულად დაერქვა ღალატი იმისთვის, რაც ჩემთვის არის ერთმნიშვნელოვნად სახელმწიფოს ინტერესების მსახურება. ყველაფრის მიუხედავად, მე მესმის, რომ მომიწია ამ მძიმე ნაბიჯის გადადგმა და დღეს რეალურ პოლიტიკაში ვარ, რა ტქმა უნდა, რაც არ უნდა დამიძახონ მოღალატე, თვლათხარიაც დაუძახიათ, მე ამასაც მოვითმენ, მესმის, რომ ეს ჩემი ტვირთია, რომელიც ჩემი მოქალაქეების წინაშე უნდა ვატარო და ამით მე ჩემს ლექსიკას არ შევიცვლი", — განაცხადა გახარიამ.

7 ივნისს ივანიშვილმა პოლიტიკიდან წასვლის შემდეგ პირველი განცხადება გაავრცელა და ყოფილი თანაგუნდელი, გიორგი გახარიას გააკრიტიკა. მან თქვა, რომ იმედგაცრუებულია და ექსპრემეირს გუნდისა და ქვეყნის მოღალატე უწოდა. მას შემდეგ, რაც გიორგი გახარიამ პარტია დატოვა ყოფილი თანაგუნდელები მას აქტიურად აკრიტიკებენ და გადაწყვეტილებას უწუნებენ. კრიტიკის საგანი გახდა მისი ახალდაშექმნილი პარტია საქართველოსთვის. ოპოზიციის ნაწილი მიიჩნევს, რომ ის ბიძინა ივანიშვილის პროექტია, ქართული ოცნება კი ცდილობს, ნაციონალური მოძრაობასთან დააკავშიროს.