თუ ვონგ კარ-ვაის მდიდარი ფერებითა და დასამახსოვრებელი კადრებით გაჯერებული ნამუშევრები მოგენატრათ, თქვენთვის მშვენიერი ამბავი გვაქვს: რეჟისორმა ამჯერად ფილმებიდან სერიალებზე გადაინაცვლა და ახალი პროექტის, Blossoms Shanghai-ის პირველი ტრეილერიც წარმოგვიდგინა.

მართალია, ტრეილერს სუბტიტრები თან არ ახლავს, თუმცა 1-წუთიანი ვიდეო, რომელშიც რეჟისორის საკულტო ხელწერა კარგად ჩანს, საკმარისია იმის მისახვედრად, რომ წინ, როგორც ყოველთვის, სასიამოვნო და მომაჯადოებელი სანახაობა გველის.

Blossoms Shanghai ახალგაზრდა ოპორტუნისტზე მოგვითხრობს, რომელიც 1990-იანი წლების შანხაიში მილიონერი ხდება. აღსანიშნავია, რომ სერიალი ვონგ კარ-ვაის ცნობილი ფილმების In the Mood for Love-ისა და 2046-ის ერთგვარი გაგრძელებაა, ამიტომ საინტერესოა, როგორ დაუკავშირდება ახალი პროექტი რეჟისორის უკვე აღიარებულ ნამუშევრებს.

აღსანიშნავია, რომ Blossoms Shanghai რეჟისორის პირველი პროექტია 2013 წლის შემდეგ. სერიალის პრემიერა 2022 წელს იგეგმება.