18 წლის მარიამ ბეგიაშვილი 47 წლის ტაქსის მძღოლს სექსუალურ შევიწროებაში ამხელს. როგორც ის On.ge-ს უყვება, 200-200-ის ტაქსის მძღოლი მას მთელი მარშრუტის განმავლობაში ავიწროებდა.

31 მაისს, 21:00 საათისთვის მარიამმ თემქიდან ორთაჭალის მიმართულებით ტაქსი გამოიძახა. ის იხსენებს, რომ როგორც კი ტაქსში ჩაჯდა, მძღოლმა სახელი ჰკითხა. ამის შემდეგ კი უთხრა: "მაგარი ძუძუები და ტრაკი გაქვს", რაც მარიამს არ ესიამოვნა.

"მთელი გზის განმავლობაში საუბრობდა ჩემი სხეულის ნაწილებზე. მერე გადმოვიდა კითხვებზე, მოდელი ხომ არ ხარო. მითხრა, რომ ფეისბუქისა და ინსტაგრამის მისამართი მიმეცა მისთვის, თითქოს შიშველ ფოტოებს დავდებდი და ამის ნახვა უნდოდა. ძალიან შემეშინდა, მარტო ვმგზავრობდი და სიბნელე იყო. ზუსტად მაშინ პირდაპირ მითხრა, რა მაგარი მოსატ*ნავი გოგო ხარო, რაზეც უკვე ძალიან შემეშინდა, თან უცნობი გზებით მიდიოდა. მკერდის ფორმის მიმოხილვა დაიწყო, მერე ხელი გადმოსწია და მუხლზე ამისვა. გვერდით გადმოჯექი, რომ უფრო უკეთესად აგათვალიერ-ჩაგათვალიეროო. ვპასუხობ, არ მინდა-მეთქი. მთელი გზა ასე გაგრძელდა. ასეთ ამაზრზენ რაღაცებს მეუბნებოდა მთელი გზის განმავლობაში, რაზეც ვეუბნებოდი, რომ არ მსიამოვნებდა", — გვეუბნება 18 წლის გოგო.

მარიამ ბეგიაშვილის თქმით, სახლისკენ მიმავალი გზის ამოცნობის შემდეგ, საუბრის ვიდეოზე ჩაწერა მოახერხა. ვიდეოში, რომელიც მან On.ge-ს მიაწოდა, ისმის:

"მაინც სუპერფეხები გაქვს და სუპერძუძუები. რომელიმე მოდელი შენზე უკეთესი არა მგონი იყოს".

ამის შემდეგ მარიამი მიუთითებს, რომ მისი საქციელი, ზოგადად, არაეთიკური და არასწორია. ის ტაქსის მძღოლს ეკითხება ასაკსაც, რაზეც კაცი პასუხობს, რომ 47 წლისაა.

მარიამმა სასამართლოს მიმართა და ჩანაწერიც წარუდგინა. მის ინტერესებს კავშირი საფარი იცავდა. პროცესი 2 ივნისს შედგა. სასამართლომ ტაქსის მძღოლი ადმინისტრაციულ სამართალდამრღვევად ცნო და 300-ლარიანი ჯარიმა დააკისრა.

"მიხარია, რომ სამართლიანობა აღვადგინე და ჩემი მხრივ, დავიცავი ყველა ის ქალი, ვისზეც შესაძლოა განუხორციელებია ან შემდგომში განახორციელებდა სექსუალურ შევიწროებას. იმედი მაქვს, ეს ამბავი მოტივაცია იქნება ადამიანებისთვის. არასოდეს დამალოთ მსგავსი ისტორიები, გახსოვდეთ, რომ არსებობს კანონი, რომელიც გვიცავს", — ამბობს მარიამი.

სექსუალური შევიწროება არის საზოგადოებრივ ადგილებში პირის მიმართ განხორციელებული არასასურველი სექსუალური ხასიათის ქცევა, რომელიც მიზნად ისახავს ან/და იწვევს მისი ღირსების შელახვას და პირს უქმნის დამაშინებელ, მტრულ, დამამცირებელ, ღირსების შემლახველ ან შეურაცხმყოფელ გარემოს. 2019 წლიდან სექსუალური შევიწროების დეფინიცია კანონში ჩაიწერა და ეს ქმედება ადმინისტრაციული წესით დასჯადი გახდა. კანონის მიღებამდე სექსუალური შევიწროებისთვის დავა შრომის კოდექსითა და ანტიდისკრიმინაციული კანონით იყო შესაძლებელი, თუმცა დეფინიცია განსაზღვრული არ იყო.

იმ შემთხვევაში, თუ ფიქრობთ რომ თქვენ მიმართ ადგილი აქვს სექსუალურ შევიწროებას, დაუყოვნებლივ მიმართეთ პოლიციას.