ინფექციური საავადმყოფოს ხელმძღვანელის, თენგიზ ცერცვაძის განცხადებით, როცა ომში მოწინავე პოზიციებზე მებრძოლი ხელმძღვანელი, ოფიცერი ან გენერალი იჭრება, ეს მისი პლუსია და არა მინუსი. ასე ეხმაურება ფაქტს, რომ ჯანდაცვის მინისტრს, ეკატერინე ტიკარაძეს კორონავირუსი დაუდასტურდა.

"ის, რომ მას დაემართა კოვიდი ნორმალურია, მე ვიტყოდი. რასაც ქალბატონი ეკა დადის და შეხვედრები აქვს, მათ შორის, სავარაუდოდ, კოვიდიანებთან, რომ არ დამართნოდა, ეს იქნებოდა გასაკვირი. მე ხუმრობით ვთქვი, რომ ეს სადღაც კარგია, ვინაიდან მიუთითებს მინისტრის ძალიან სერიოზულ სოციალურ აქტიურობა, ესე იგი.

ეს ასეა, საერთოდ. ის, ვინც ჯარში იბრძვის, მოწინავე პოზიციებზე იბრძვის, მათ შორის, ხელმძღავნელები, ოფიცრები, გენერლები და თუ ის დაიჭრა ომში, მას ეს ეთვლება პლუსად და არა მინუსად, რომ ომში დაიჭრა. იგივეა ეს, როდესაც კოვიდთან ბრძოლის წინა ხაზზე მდგომი ექიმები ავადდებიან ზოგჯერ, ეს მათთვის პლუსია და არა მინუსი", — თქვა მან რუსთავი 2-ის ეთერში.

1-ლ ივნისს ჯანდაცვის მინისტრს, ეკატერინე ტიკარაძეს კორონავირუსი დაუდასტურდა. მინისტრმა კორონავირუსის საწინააღმდეგო ვაქცინა AstraZeneca-ს პირველი დოზა 23 მარტს გაიკეთა. ის საჩხერის სამედიცინო ცენტრში პირდაპირ ეთერში აიცრა.