ეროვნული ბანკის პრეზიდენტი, კობა გვენატაძის თქმით, მისმა თანამშრომლებმა პანდემიის პერიოდში პრემიები დაუღალავი შორმისთვის მიიღეს. ამის შესახებ მან საფინანსო-საბიუჯეტო კომიტეტში მოსმენისას განაცხადა.

IDFI-ს მონაცემებით, საჯარო დაწესებულებებს შორის ყველაზე მეტი პრემია, 5,5 მილიონი ლარი ეროვნულმა ბანკმა გასცა. ამასთან დაკავშირებით სებ-ის პრეზიდენტს კითხვა დაუსვა ლელოს ლიდერმა, მამუკა ხაზარაძემა.

კობა გვენეტაძემ აღნიშნა, რომ ეროვნული ბანკი თვითკმარი ორგანიზაციაა, რომელიც ბიუჯეტიდან ფულს არ იღებს და ბიუჯეტში დივიდენდები შეაქვს. როგორც მან აღნიშნა, პანდემიის პერიოდში ეროვნულ ბანკს მნიშვნელოვანი ფუნქცია ჰქონდა.

"ალბათ ჯანდაცვას ჰქონდა ასეთი მიმართულება და კიდევ ჩვენ. ერთი, რომ არ უნდა გაჩერებულიყო ქვეყანაში ნაღდი ფულის მიწოდება 24 საათის განმავლობაში და ეს არ არის მარტივი საქმე, როდესაც პანდემიის გამო ლოქდაუნი ცხადდება ქვეყანაში. მეორე, სისტემას უნდა ემუშავა გამართულად. ანუ ყოველი გადახდის უკან, რომელსაც ვაკეთებთ, ზუსტად ეროვნული ბანკი და ის სისტემა დგას, რომელსაც ეროვნული ბანკი უვლის. ამავე დროს ფინანსურ სისტემა, მიკროსაფინანსო ორგანიზაციები, კომერციულ ბანკები, მათ უნდა ემუშავათ", — აღნიშნა გვენეტაძემ.

მისივე თქმით, პანდემიამ ეროვნული ბანკის თანამშრომლების ოჯახის წევრებზეც აისახა:

"ეს ანაზღაურება მათ [თანამშრომლებმა] ურთულესი წლის განმავლობაში დაუღალავი და ხშირად სიცოცხლის რისკის ფასად მიიღეს. მე, როგორც ორგანიზაციის ხელმძღვანელს, უფლება არ მქონდა, რომ არ დამეფასებინა მათი ასეთი თავდადება".

IDFI-ს მონაცემებით, 2020 წელს ეროვნული ბანკის ორმა ვიცე-პრეზიდენტმა ჯამში 94 760 ლარი მიიღეს (ეროვნული ბანკის პრეზიდენტზე არც პრემია და არც სახელფასო დანამატი არ გაცემულა).