ბოდბელი მთავარეპისკოპოსი იაკობი არჩევნებში ჩართვას აანონსებს. მისი თქმით, ამ არჩევნებს "შეხედავს" და შემდეგ "რაღაც პერიოდი" ჩაერთვებიან. მეუფემ ჟურნალისტებს განუცხადა, რომ "უკვე მოფიქრებული აქვთ" და არჩევნებზე გამარჯვებაც არ გაუჭირდებათ.

"თუ დავინახე, ამ არჩევნებს შევხედავ, ამ არჩევნებს გავატარებ, შევხედავ, რა ხდება, რა არა [...] ჩავერთვებით მერე, რა, რაღაც პერიოდი, ყველანაირი ფორმით. ასეთ არევას, საქართველოს არევას არავის არ ვაპატიებთ. მანამდე უკვე ეკლესიაში მოგვარებული გვექნება, ვინც მტრობს ეკლესიას იმასთან [...] მე ვთქვი, ჩვენ ჩავუდგებით ახალ ძალას-თქო. მოფიქრებულიც გვაქვს, რაც უნდა გავაკეთოთ, არც მხარდაჭერა გაგვიჭირდება და არაფერი გაგვიჭირდება არჩევნებზე გამარჯვებისთვის. ბოლოში რა პარტიებიც შემოვიდნენ, არცერთთან, ჩვენ ცალკე. პირადად გეუბნები, ახალ ძალებს ჩავუდგები სათავეში და ვისთან იყო, ვისთან არა, სულ არ მაინტერესებს", — თქვა მან.

შემოდგომაზე თვითმმართველობის არჩევნები უნდა ჩატარდეს. ოპოზიციაში უკვე საუბრობენ იმაზე, რომ ამ არჩევნებზე ისინი კვლავ გაერთიანებული სახით უნდა წარდგნენ. კერძოდ, არის ვარაუდი, რომ ოპოზიცია საერთო კანდიდატად ნაციონალური მოძრაობის თავმჯდომარეს, ნიკა მელიას დააყენებს.

თუმცა რამდენიმე პარტიამ ენმ-ს კანდიდატის მხარდაჭერაზე უარი უკვე თქვა, მათ შორის, სტრატეგია აღმაშენებლის ლიდერმა, გიორგი ვაშაძემ. მისი განცხადებით, უნდა შეიქმნას მესამე, "მძლავრი მიზიდულობის ცენტრი", რომლითაც ხელისუფლების ცვლილების პროცესი დაიწყება. მელიას კანდიდატურის მხარდაჭერაზე უარს აცხადებს მოქალაქეების ლიდერიც, ალეკო ელისაშვილი. მისი თქმით, პარტიაში მიდის მსეჯლობა, რომ თბილისის მერობაზე საკუთარი კანდიდატურა დააყენოს. რაც შეეხება გირჩი — მეტი თავისუფლების ლიდერის, ზურაბ ჯაფარიძეს, ის ამბობს, რომ თუ ექნება შემოთავაზება იყოს ოპოზიციის საერთო კანდიდატი უარს არ იტყვის და არც ვინმეს სასარგებლოდ თავის კანდიდატურას მოხსნის.

საკუთარი კანდიდატურა ჯერ არ დაუყენებია არც მმართველ პარტიას. მედია საუბრობს იმაზე, რომ მოქმედი მერი, კახა კალაძე ქართული ოცნების კანდიდატი არ იქნება. ამას არ ადასტურებენ "ოცნების" ლიდერები. ირაკლი კობახიძის თქმით, პარტიაში "ყველას, 36 ათასივე წევრს" ექნება სურვილი, რომ კახა კალაძე თბილისის მერობის კანდიდატი იყოს. მისი განცხადებითვე, კალაძე "ერთ-ერთი გამორჩეული ლიდერია" და უპირველეს ყოვლისა, თავად მის პოზიციაზეა დამოკიდებული, იქნება თუ არა ის მერობის კანდიდატი.

გარდა ამისა, ვრცელდება ინფორმაცია, რომ საკუთარ კანდიდატურას დააყენებს ყოფილი პრემიერმინისტრი, გიორგი გახარიაც. ამას სკეპტიკურად უყურებს მმართველი პარტია. ქართული ოცნების თავმჯდომარის, ირაკლი კობახიძის განცხადებით, თუ გახარია თბილისის მერობის კანდიდატად საკუთარ თავს დააყენებს "საუკეთესო შემთხვევაში მესამე ადგილზე გავა".