რიონის ხეობის აქტივისტის, მარიტა მუსელიანის თქმით, მას შემდეგ რაც მოძრაობის დაფინანსება საუბარი დაიწყო, შემოწირულობებმა მკვეთრად იმატა. ამის შესახებ მან ჟურნალისტებს განუცხადა. როგორც მუსელიანი განმარტავს, მათ უკვე მიმართეს აუდიტს.

"ჩვენთვის აუდიტი სავალდებულო არ არის და ვაპირებდით ანგარიშებისა და ხარჯის პირდაპირ გამოქვეყნებას. მერე გაირკვა, რომ ეს ძალიან დიდი მასალაა და ამის გადახედვა ძნელი იქნებოდა. ყველაზე სწორი და კარგი ფორმა იქნებოდა აუდიტი. აუდიტის იქნება დასკვნა ისეთი, რომელშიც სრულად წარმოჩინდება ყველაფერი და არავითარ შეკითხვას არ დატოვებს", — აღნიშნა მუსელიანმა.

მისივე თქმით, აუდიტში მათ ფულს არ ართემევენ და ესეც შემოწირულობის ნაწილში შევა.

რამდენიმე დღეა აქტიური განხილვის საგანი გახდა, ვინ აფინანსებს რიონის ხეობის მცველებს. მოქალაქეთა მცირე ნაწილი საუბრობს სავარაუდო პარტიულ ან რუსულ ინეტერესებზე, თუმცა თავიანთი თეორიები არ დაუსაბუთებიათ. აქტივისტები ბრალდებებს უარყოფენ და აცხადებენ, რომ თანხას ძირითადად მხარდამჭერებისგან და ემიგრანტებისგან იღებენ. ნამახვანჰესის მოწინააღმდეგეთა დაფინანსებით დაინტერესება გამოთქვა ქართული ოცნების თავმჯდომარე ირაკლი კობახიძემაც.