ნამახვანჰესის მშენებლობის მოწინააღდეგის, ვარლამ გოლეთიანის განცხადებით, თავიანთ ფინანსებს გაასაჯაროებენ, რის შემდეგაც მოუწოდებენ ყველას, ვინც მათი დაფინანსებით არის დაინტერესებული, რომ იგივე გააკეთონ.

"ჩვენ გამოვდივართ ინიციატივით და გვინდა, რომ ეს გააჟღეროთ. ჩვენ დავდებთ ფინანსების წყაროებს, საიდან მოდის ეს ფინანსები და რასაც ვამბობთ, რომ არიან ემიგრანტები და ჩვენი თანამოქალაქეები, ეს დასაბუთდება. შემდეგ მოვუწოდებთ ყველა ავტორს ამ ნარატივისა, ვინც დაიწყო ეს ლაპარაკი, საიდან ფინანსდებიანო, თავადაც გაასაჯაროვონ საიდან ფინანსდებიან.

ჩვენ დავიწყებთ ამ პროცესს და შემდეგ ყველა ორგანიზაციამ, ვინც დააყენა ეს საკითხი დღის წესრიგში, მათ შორის პოლიტიკური პარტიები, რა მნიშვნელობა აქვს, თუ გინდა ცალკეული პერსონები იყოს, მაგალითად ელისო კილაძე საუბრობდა საიდან ვფინანსდებით. სიმართლე გითხრათ, ჩვენც გვაინტერესებს საიდან ფინანსდება ელისო კილაძე. თუ დადებს ცხრილს ვინ ურიცხავს თანხმებს, მოხარული ვიქნებით. ჩვენ გამოვალთ ამ ინიციატივით და დაველოდებით სხვები როდის გაასაჯაროებენ თავიანთ დაფინანსებას", — განაცხადა გოლეთიანმა.

მისი განმარტებით, ხშირად იღებენ ჩარიცხვებად წვრილ თანხებს, 5-10 ლარს, რაც საბოლოოდ გროვდება და ახერხებენ ისეთი აპარატურის დაქირავებას, როგორიც თბილისში ჰქონდათ. მისივე თქმით, სცენის ღირებულება დაახლოებით 25 ათასი ლარი იყო.

"აქ მთავარი რა არის, რომ ხო არის წვრილი თანხები, რომელიც ირიცხება და შემოდის საბოლოოდ იმდენი, რომ ვღებულობთ ისეთი ტიპის თანხას, რომელიც ჩვენ გვაძლევს საშუალებას იმისა, რომ სცენა დავდგათ ისეთი, როგორიც დედაქალაქშია.

როცა ათ ლარს და ხუთ ლარს რიცხავს ადამიანი, ვხვდებით რომ უბრალო ადამიანის ჩარიცხული და არაა ჯორჯ სოროსის. ამას მგონი ყველა აღიქვამს", — ამბობს ის.

რამდენიმე დღეა აქტიური განხილვის საგანი გახდა, ვინ აფინანსებს რიონის ხეობის მცველებს. მოქალაქეთა მცირე ნაწილი საუბრობს სავარაუდო პარტიულ ან რუსულ ინეტერესებზე, თუმცა თავიანთი თეორიები არ დაუსაბუთებიათ. აქტივისტები ბრალდებებს უარყოფენ და აცხადებენ, რომ თანხას ძირითადად მხარდამჭერებისგან და ემიგრანტებისგან იღებენ.

ნამახვანჰესის მოწინააღდეგეთა დაფინანსებით დაინტერესება გამოთქვა ქართული ოცნების თავმჯდომარე ირაკლი კობახიძემაც.