მასაჩუსეტსის შტატში მცხოვრები ქალი, რომელმაც ლატარიის ბილეთი იყიდა და ნაგავში გადააგდო, მაღაზიის კეთილი მეპატრონის წყალობით, მილიონერად იქცა.

მარტში ლეა როუზ ფიგამ სამსახურთან ახლოს მდებარე მაღაზიაში ლატარიის $30-იანი გადასაფხეკი ბილეთი შეიძინა. როგორც ფიგა აღნიშნავს, იგი ჩქარობდა, რადგან შესვენებაზე იყო გამოსული, ამიტომ ბილეთი სწრაფად გადაფხიკა და, "რადგან მოგებულს არ ჰგავდა", ნაგვის ურნაში მოისროლა.

ბილეთმა ურნაში კვირაზე მეტი გაატარა და ის მხოლოდ 10 დღის შემდეგ აღმოაჩინა მაღაზიის მეპატრონის შვილმა, რომელმაც შეამჩნია, რომ ყველა ციფრი გადაფხეკილი არ იყო. გადასაფხეკის მიღმა კი, არც მეტი, არც ნაკლები, ერთი მილიონი დოლარი იმალებოდა.

ფიგა მაღაზიის ერთგული კლიენტი აღმოჩნდა, ამიტომ, ოჯახი ბილეთის პატრონის ვინაობას ადვილად მიხვდა და მას სამსახურში მიაკითხა.

მომავალმა მილიონერმა ლამის მეორედ დაიფრინა იღბალი, როცა მასთან სამსახურში მისულ მაღაზიის მეპატრონეებს უთხრა, რომ "არ ეცალა". თუმცა, როცა დაჟინებული თხოვნით მათ სანახავად გავიდა, მომხდარი ვერაფრით დაიჯერა.

"ამას ვინ გააკეთებდა? შესანიშნავი ხალხია. სიხარულზე მეტს ვგრძნობ ახლა", — ამბობს ახალბედა მილიონერი.

ფოტო: Massachusetts State Lottery

ფიგას თქმით, 2020 წელი, კოვიდპანდემიის გამო, მისთვის განსაკუთრებით მძიმე იყო, ამიტომ საკუთარ იღბალს და მაღაზიის კეთილ მეპატრონეებს ერთიორად უმადლის.

ლატარიის კომისიის გადაწყვეტილებით, არც მეპატრონეები რჩებიან უსაჩუქროდ — მათ $10 000 გადაეცემათ ბონუსის სახით.

ფიგამ კი თავისი და საკუთარი ოჯახის ოცნებების ასრულება უკვე დაიწყო. მიუხედავად ამისა, სამსახურისთვის თავი არ დაუნებებია — უბრალოდ, დარჩენილ თანხას საპენსიო ასაკისთვის გადაინახავს.