მინსკში საერთაშორისო თვითმფრინავის დაშვებისა და ჟურნალისტის დაკავების შემდეგ ევროკავშირი ბელარუსს სამი მილიარდის ოდენობის საინვესტიციო პაკეტს გაუყინავს. ამის შესახებ ევროკომისარმა ურსულა ფონ დერ ლეიენმა ევროკავშირის სპეციალური სამიტის წინ, სადაც, ბელარუსის საკითხი განიხილეს.

"ძალიან მკაცრი პასუხი იქნება, რადგან ეს აღმაშფოთებელი ქმედებაა. ლუკაშენკო და მისი რეჟიმი უნდა ხვდებოდნენ, რომ ეს სერიოზულ შედეგებს იქონიებს", — აღნიშნა ევროკომისიის პრეზიდენტმა.

მან განმარტა, რომ ახალი სანქციები სხვადასხვა მიმართულებით განიხილება როგორც ინდივიდუალური, ისე კომპანიების მიმართაც. გარდა ამისა, მან დაამატა რომ ბელარუსისთვის სამი მილიარდის ეკონომიკური და საინვესტიციო პაკეტი იყო მზად.

"ეს შეჩერებულია და გაყინულია მანამ, სანამ ბელარუსი დემოკრატიული არ გახდება", — განაცხადა ფონ დერ ლეიენმა.

23 მაისს ათენიდან ვილნიუსისკენ მიმავალი Ryanair-ის თვითმფრინავი მინსკის აეროპორტში საგანგებოდ დაეშვა. ეს მას შემდეგ მოხდა, რაც გავრცელდა ინფორმაცია, რომ ბორტზე ასაფეთქებელი. საბოლოოდ შეტყობინება ცრუ აღმოჩნდა. ბელარუსის თავზე კი თვითმფრინავს სამხედრო გამანადგურებელი MiG-29 დაყვებოდა.

მგზავრებს შორის ოპოზიციური ტელეგრამარხის Nexta-ს ხელმძღვანელი, რომან პროტასევიჩი, რომლის წინააღმდეგაც ბელარუსში სისხლის სამართლის საქმეა აღძრული და მასობრივი არეულობის ორგანიზებას ედავებიან. პროტასევიჩი და მისი შეყვარებული, რუსეთის მოქალაქე სოფია საპეგა აეროპორტში დააკავეს. შვიდსაათიანი დაკავების შემდეგ კი ლაინერი ვილნიუსში ჩავიდა.

ევროპული ქვეყნების დიდმა ნაწილმა თვითმფრინავის დაშვება სწორედ პროტასევიჩის დაკავებას დაუკავშირა. ლიეტუვამ თავის მოქალაქეებს მოუწოდა ბელარუსი დატოვო და განაცხადა, რომ ბელარუსის საჰაერო სივრციდან რეისების მიღებასა და გაგზავნას წყვეტს. ბელარუსთან საჰაერო მიმოსვლის შეწყვეტას გეგმავს უკრაინა.

დაკავებიდან თითქმის ერთი დღის თავზე ბელარუსის სახელმწიფო მედიებმა პროტასევიჩის ვიდეო გაავრცელეს, სადაც ის აცხადებდა, რომ აღიარებით ჩვენებას აძლევდა. ასევე, აცხადებდა, რომ თავს კარგად გრძნობდა და მინსკის იზოლატორში იმყოფებოდა.