ბელარუსის სახელმწიფო მედიასაშუალებები და ტელეგრამ არხები დაკავებული ჟურნალისტის, რომან პროტასევიჩის ვიდეოს აქვეყნებს. როგორც პროტასევიჩი ვიდეოში ამბობს, მასობრივი არეულობის ორგანიზების საქმეზე აღიარებით ჩვენებას აძლევს.

ვიდეოდან ირკვევა რომ დაკავებული ჟურნალისტი მინსკის იზოლატორში იმყოფება.

"შემიძლია განვაცხადო, რომ ჯანმრთელობასთან დაკავშირებით არანაირი პრობლემა არ მაქვს, მათ შორის არც გულთან და არც სხვა ორგანოებთან. თანამშრომლების მხრიდან ჩემ მიმართ დამოკიდებულება კანონის ფარგლებში და კორექტულია. ვაგრძელებ გამოძიებასთან თანამშრომლობას და მინსკში მასობრივი არეულობის ორგანიზების საქმეზე აღიარებით ჩვენებას ვაძლევ", — ამბობს პროტასევიჩი.

ვიდეოს გამოეხმაურა ოპოზიციონერი ლიდერის, სვეტალანა ტიხანოვსკაიას მრჩეველი, ფრანკ ვეჩერკა. მან არ გამორიცხა, რომ ჟურნალისტი შესაძლოა ნაცემი იყოს.

23 მაისს ათენიდან ვილნიუსისკენ მიმავალი Ryanair-ის თვითმფრინავი მინსკის აეროპორტში საგანგებოდ დაეშვა. ეს მას შემდეგ მოხდა, რაც გავრცელდა ინფორმაცია, რომ ბორტზე ასაფეთქებელი. საბოლოოდ შეტყობინება ცრუ აღმოჩნდა. ბელარუსის თავზე კი თვითმფრინავს სამხედრო გამანადგურებელი MiG-29 დაყვებოდა.

მგზავრებს შორის ოპოზიციური ტელეგრამარხის Nexta-ს ხელმძღვანელი, რომან პროტასევიჩი, რომლის წინააღმდეგაც ბელარუსში სისხლის სამართლის საქმეა აღძრული და მასობრივი არეულობის ორგანიზებას ედავებიან. პროტასევიჩი და მისი შეყვარებული, რუსეთის მოქალაქე სოფია საპეგა აეროპორტში დააკავეს. შვიდსაათიანი დაკავების შემდეგ კი ლაინერი ვილნიუსში ჩავიდა.

ევროპული ქვეყნების დიდმა ნაწილმა თვითმფრინავის დაშვება სწორედ პროტასევიჩის დაკავებას დაუკავშირა. ლიეტუვამ თავის მოქალაქეებს მოუწოდა ბელარუსი დატოვო და განაცხადა, რომ ბელარუსის საჰაერო სივრციდან რეისების მიღებასა და გაგზავნას წყვეტს. ბელარუსთან საჰაერო მიმოსვლის შეწყვეტას გეგმავს უკრაინა.