ნამახვანჰესის მშენებლობის მოწინააღმდეგე აქტივისტმა, ვარლამ გოლეთიანმა განაცხადა, რომ ხელისუფლებასთან რაიმე ტიპის კომპრომისს არ აპირებენ. მისი თქმით, ყველა ეს მეთოდი უკვე ამოწურულია.

"ჩვენ არ ვართ ის ხალხი, ვინც აქ მოვიდა გუშინ და ახირებულად ვითხოვთ, რომ რაღაცა არ გვინდა. მთელმა საზოგადოებამ იცის ის არგუმენტირებული და კონსტრუქციული მიდგომა საკითხთან დაკავშირებით. ნახევარი წელია, რიონის ხეობაში ვართ უკვე და არ არის ცოტა დრო, ვაჩვენეთ საზოგადოებას და მხარდაჭერაც, არსებითად, ამ ყველაფერმა შექმნა — ყველამ კარგად დაინახა ხელისუფლების არასწორი, უსამართლო, უარგუმენტო ნაბიჯები ჩვენი მისამართით", — თქვა მან ტელეკომპანია ფორმულას ეთერში.

გოლეთიანს არ დაუკონკრეტებია, რა გეგმები აქვთ თუ ხელისუფლება ვადის ამოწურვის შემდეგ მათ მოთხოვნებს არ შეასრულებს, თუმცა აღნიშნა, რომ გაჩერებას არ აპირებენ.

"ვფიქრობ, არსებითი მნიშვნელობა არც აქვს, საით დავიძვრებით და რას გადავკეტავთ. აქ მთავარი არის ის, რომ ჩვენ ჩაბმული ვართ არგუმენტირებულ და სამართლიან ბრძოლაში და აქ ჩვენ არ გვაქვს უფლება, რომ გავჩერდეთ. უნდა ვიმოქმედოთ ყველა შემთხვევაში, ამიტომ აუცილებლად ვიმოქმედებთ", — განაცხადა გოლეთიანმა.

რესპუბლიკის მოედანზე ნამახვანჰესის საწინააღმდეგო აქცია 23 მაისს დაიწყო. მათ მოგვიანებით პირველი რესპუბლიკის მოედანზე კარვები გაშალეს. მოქალაქეთა ნაწილი რესპუბლიკის მოედანზე მთელი ღამის განმავლობაში დარჩა. აქციაზე იმყოფებოდნენ როგორც აქტივისტები, ასევე, სხვადასხვა რეგიონიდან ჩამოსული ადამიანები.

ნამახვანჰესის მშენებლობის წინააღმდეგ მიმდინარე აქციაზე აქტივისტმა, ვარლამ გოლეთიანმა აქციაზე მოთხოვნები გააჟღერა და მათ შესასრულებად ხელისუფლებას ვადა 24 მაისის 12 საათამდე მისცა. მოთხოვნების შეუსრულებლობის შემთხვევაში მან დედაქალის პარალიზება დააანონსა.

მოთხოვნები, რომლებიც ვარლამ გოლეთიანმა აქციაზე გააჟღერა შემდეგია:

• დატოვოს რიონის ხეობა კომპანიამ ენკამ;
• გაწყდეს ენკასა და სახელმწიფოს შორის დადებული ხელშეკრულება და გაუქმდეს ყველა ის დოკუმენტი, რომელიც 2015 წლიდან დღემდეა გაცემული;
• გამოცხადდეს მორატორიუმი ენერგოსექტორში;
• გადადგეს ეკონომიკის მინისტრი და დადგეს არამხოლოდ ნათია თურნავას, არამედ ჰესის დოკუმენტაციის მომზადებაში ჩართული ადამიანებიც პასუხისმგებლობის საკითხი.

ნამახვანჰესის მოწინააღმდეგეებსა და ხელისუფლებას შორის უშედეგო მოლაპარაკებების შემდეგ პროტესტის დედაქალაქში გადმოტანის გადაწყვეტილება მიიღეს. მთავრობამ მათ ჰესის მშენებლობაზე ერთი წლის განმავლობაში მორატორიუმი შესთავაზა, თუმცა აქციის მონაწილეების თქმით, მოსამზადებელ სამუშაოები არ გაჩერებულა.

პროტესტის თავდაპირველი ადგილი სოფელი ნამოხვანია, სადაც რამდენიმე თვის განმავლობაში ისინი ნამახვანჰესის მშენებლობას უწყვეტად აპროტესტებენ. მათ ადგილზე კარვები ჰქონდათ გაშლილი.

ისინი ამბობენ, რომ ეკოლოგიური საფრთხის გარდა, მთავრობამ მშენებელ კომპანიასთან გაფორმებული ხელშეკრულებით სახელმწიფო ინტერესები დათმო.

რიონის ხეობის აქტივისტებისგან განსხვავებით, ნამახვანჰესის კასკადის აუცილებლობასა და წარმატებაზე საუბრობს ხელისუფლება. ეკონომიკის სამინისტროს არაერთხელ განუცხადებია, რომ ეს პროექტი ქვეყნის ენერგოდამოუკიდებლობისკენ და უსაფრთხოებისკენ ერთ-ერთი აუცილებელი ნაბიჯია.

რიონის ხეობაში ჰესს კომპანია ენკა აშენებს. ENKA აცხადებს, რომ ნამახვანჰესის პროექტი დეტალურადაა შესწავლილი და რაიმე საფრთხეს მოსახლეობისთვის ან ხეობისთვის არ წარმოადგენს.

გაიგე მეტი:

• აღვუთქვი, რომ რამდენიმე დღეში მიიღებენ პასუხს — ბარნაბიშვილი აქტივისტების პირობებზე
• რეპრესიულ მეთოდებს იყენებენ, მაგრამ, ეს მუშაობს ჩვენ სასარგებლოდ — გოლეთიანი
• მოიხსნა ის აპრიორი პირობა, რომ ჰესი ყველა შემთხვევაში აშენდება — მუსელიანი ნამახვანის თემაზე შეხვედრის შემდეგ
• შევთანხმდით, რომ წითელი ხაზების გარეშე ვლაპარაკობთ — სუბარი აქტივისტებთან დიალოგის დასრულების შემდეგ