კულტურის, სპორტისა და ახალგაზრდობის მინისტრის, თეა წულუკიანის თქმით, თუ რაიმე პრობლემაა ნინოწმინდის პანსიონში, შესაბამისი სახელმწიფო უწყება მას ეკლესიასთან თანამშრომლობით გამოასწორებს.

"სახელმწიფოს წარმომადგენლები, სოციალური მუშაკები, ნინოწმინდაში და ყველა სახლში, რომელსაც მართავს ესა თუ ის ეპარქია, შედიან უპრობლემოდ. ჩვენ ვიცით, რომ სოციალური მუშაკები იქაც იყვნენ და ვიცით მათი ვიზიტის შედეგები. თუ რაიმეა გამოსასწორებელი, რა თქმა უნდა, შესაბამისი უწყება ამას გამოასწორებს ეკლესიასთან თანამშრომლობით [...] სახალხო დამცველი რომ გამოჯანმრთელდება, თუ მასაც დაუშვებენ იმ სახლში, რა თქმა უნდა, ძალიან კარგი იქნება", — განაცხადა თეა წულუკიანმა.

გუშინ, 19 მაისს, სახალხო დამცველის წარმომადგენლები ნინოწმინდის ბავშვთა პანსიონში ისევ, უკვე მეორედ არ შეუშვეს. როგორც ისინი ამბობენ, პანსიონის წარმომადგენლებმა მათთან საუბარი არ ისურვეს და მიზეზად ხელმძღვანელის მითითება დაასახელეს.

მათივე ინფორმაციით, საკითხის გასაჯაროების შემდეგ სოციალურ მუშაკს, თითქმის ერთი წლის შემდეგ, პანსიონში ვიზიტის უფლება მისცეს. თუმცა, სახალხო დამცველის აპარატში აცხადებენ, რომ ეს ვერ ჩაითვლება გაეროს ბავშვის უფლებათა კომიტეტის დროებითი ღონისძიებების შესრულებად.

გაიგე მეტი: