ენერგეტიკის მინისტრის კახა კალაძის თქმით, პოლიტიკას ახალ თანამედროვე საფეხურზე გადასასვლელად სჭირდება, რომ ფიზიკური ანგარიშსწორება წარსულს უნდა ჩაბარდეს:

"დამნაშავემ უნდა აგოს პასუხი კანონის წინაშე, ერთხელ და სამუდამოდ საქარტველოში უნდა დავასრულოთ პოლიტიკოსების მიმართ, ერთმანეთის მიმართ მუშტით ანგარიშსწორება" - თქვა მან ჟურნალისტებთან საუბრისას.

ქართული ოცნების ლიდერის თქმით, კორცხელის ინციდენტზე შსს-მ გამოძიება დაიწყო და ის დარწმუნებულია, რომ ყველა დამნაშავე კანონის წინაშე დასჯილი იქნება:

"მოკვლევა დაწყებულია, იდენტიფიცირება დაწყებულია, ჩვენ მოვისმინეთ შინაგან საქმეთა სამინისტროს განცხადება და დარწმუნებული ვარ ყველა ეს ადამიანი იქნება დაკავებული და კანონის წინაშე დასჯილი".

კახა კალაძის თქმით, ფიზიკურ დაპირისპირებაში როგორც ქართული ოცნების, ისე ნაციონალური მოძრაობის მხარდამჭერები მონაწილეობდნენ:

"ისინი არიან მხარდამჭერები, ზოგი პარტიის წევრია, როგორც ნაციონალური მოძრაობის ლიდერებს ბატონ გიგა ბოკერიას და ბატონ ნიკა მელიას ახლდათ თავისი მხარდამჭერები, ისე ქართულ ოცნებას ჰყავდა თავისი მხარდამჭერები. ეს საარჩევნო პროცესში ნორმალურია ხდება მობილიზება ასე ვთქვათ მხარდამჭერების, გამხნევება, ეს რაღაც სიახლე არ არის. თუმცა ფაქტი რომელიც მოხდა პირადად ჩემთვის და ქართული ოცნებისთვის არის კატეგორიულად მიუღებელი და ზოგადად ეს ქვეყნის დემოკრატიულად განვითარებას ხელს უშლის".

გუშინ, 22 მაისს, ზუგდიდში, კორცხელის საარჩევნო უბანზე, სადაც შუალედური ადგილობრივი თვითმმართველობის არჩევნები მიმდინარეობდა, ნაციონალური მოძრაობის წევრებს, მათ შორის გიგა ბოკერიასა და ნიკა მელიას, სცემეს.