ევროკავშირის ელჩის საქართველოში, კარლ ჰარცელის განცხადებით, პოლიტიკოსებისგან მნიშვნელოვანია არამხოლოდ სამართლებრივი კუთხის მოწესრიგება LGBTQ თემის უფლებების დასაცავად, არამედ საზოგადოებრივი განწყობის შექმნაც.

"მნიშვნელოვანია რომ დოკუმენტზე ხელმოწერა საჯარო იყო და პოლიტიკურმა პარტიება ამის შესახებ შეთავაზება საჯაროდ მიიღეს. კარგია, რომ საქართველოს აქტიური სამოქალაქო საზოგადოება და სახალხო დამცველი ჰყავს. უდიდესი გამოწვევა საზოგადოებრივი აზრია. ამ კუთხით პოლიტიკოსებისგან მნიშვნელოვანია არამხოლოდ სამართლებრივი კუთხის მოწესრიგება ლგბტქ თემის უფლებების დასაცავად, არამედ საზოგადოებრივი განწყობის შექმნა. ხაზგასასმელია მედიის როლიც. კიდევ ერთხელ მადლობას ვუხდი საქართველოს ლგბტქ თემს თავიანთი ძალისხმევისთვის და ასევე, ამ ღონისძიების ორგანიზებაში შეტანილი წვლილისთვის", — განაცხადა ჰარცელმა Tbilisi Pride-ს ღობისძიებაზე სიტყვით გამოსვლისას.

Tbilisi Pride-მა LGBT უფლებების შესახებ 15 პარტიასთან თანამშრომლობა დაიწყო და საერთო დოკუმენტს მოაწერა ხელი.

17 მაისს მსოფლიოში ჰომოფობიასთან და ტრანსფობიასთან ბრძოლის საერთაშორისო დღე აღინიშნება. საქართველოში ლგბტქ+ ადამიანები ამ დღეს სათანადოდ ვერ აღნიშნავენ, რადგან ძალადობრივი ჯგუფები მათ ამაში ხელს უშლიან.

15 მაისს, ლგბტქ აქტივისტებმა ინსტალაცია — ფერადი კაბინა წარწერით welcome to the closet დაამონტაჟეს, სადაც ფალავანდიშვილი მივიდა და ინსტალაცია დააზიანა. ის აქტივისტებს შეურაცხყოფას აყენებდა.

აქტივისტებმა გამოიძახეს პოლიცია, რომელიც ადგილზე დაახლოებით 10 წუთში მივიდა, თუმცა ფალავანდიშვილი არ დაუკავებია და მხოლოდ რამდენიმე მეტრის მოშორებით გადაიყვანა. როგორც ადგილზე მყოფი On.ge-ს ჟურნალისტმა თქვა, მოგვიანებით ჰომოფობიური და ძალადობრივი ჯგუფის ლიდერი განარიდეს, თუმცა იქ დარჩა მისი რამდენიმე მხარდამჭერი, რომლებმაც ჰომოფობიური ბანერიც მიიტანეს.

მოგვიანებით ცნობილი გახდა, რომ ფალავანდიშვილი გამოკითხვაზე გადაიყვანეს, თუმცა არ დაუკავებიათ. ლგბტქ აქტივისტებზე თავდასხმისა და ინსტალაციის დაზიანების საქმეზე შინაგან საქმეთა სამინისტრომ გამოძიება სისხლის სამართლის კოდექსის 156-ე მუხლით დაიწყო, რაც დევნას გულისხმობს.