ქვემო ქართლში გაგის ციხეზე აღმართული ჯვარი დააზიანეს. დაზიანებული ჯვრის ფოტოები 13 მაისს ფეისბუქით გავრცელდა, საიდანაც ჩანს, რომ ლითონის კონსტრუქცია მოღუნულია.

შინაგან საქმეთა სამინისტროში On.ge-ს განუცხადეს, რომ გამოძიება სისხლის სამართლის კოდექსის 187-ე მუხლით არის დაწყებული, რაც ნივთის დაზიანებას ან განადგურებას გულისხმობს.

აღნიშნულ შემთხვევას გამოეხმაურა სოციალური სამართლიანობის ცენტრი. ორგანიზაციაში აღნიშნავენ, რომ ჯვარი დამზადებულია ლითონისგან, არის მოცულობითი, მისი აღმართვის დროს გავრცელებული ფოტოების მიხედვით საკმაოდ მძიმეა და მაღალი ალბათობით შეუძლებელია ხელით, სპეციალური მოწყობილობის გარეშე მისი დაზიანება.

"ჩნდება ეჭვი, რომ მომხდარი ფაქტი არ წარმოადგენს შემთხვევითობას და არის წინასწარ დაგეგმილი, განზრახი მოქმედება", — აღნიშნავენ ორგანიზაციაში.

გარდა ამისა, სოციალური სამართლიანობის ცენტრში აცხადებენ, რომ გასულ წლის იანვარში აგრეთვე გარკვეულ ინციდენტს ჰქონდა ადგილი. კერძოდ, ციხეზე აღმართული ჯვარი და სახელმწიფო დროშა გაურკვეველ ვითარებაში დაიკარგა. ქურდობის ფაქტზე შინაგან საქმეთა სამინისტრომ გამოძიება მაშინაც დაიწყო, თუმცა მას რაიმე შედეგი არ მოჰყოლია.

ორგანიზაცია მოუწოდებს შინაგან საქმეთა სამინისტროს დროული გამოძიებისკენ, ხოლო მარნეულის მუნიციპალიტეტს მსგავსი პროვოკაციული მოქმედებების თავიდან აცილების მიზნით ციხის მიმდებარე ტერიტორიაზე ვიდეოკამერები დაამონტაჟონ.