საქართველოს პროკურატურის ინფორმაციით, დააკავეს კაცი, რომელმაც ცოლი აწამა, ძალადობდა, დასახიჩრებითა და სიცოცლხლის მოსპობით ექმურებოდა.

"გამოძიებით დადგინდა, რომ დ.ა. გენდერის ნიშნით შეუწყნარებლობის მოტივით ოჯახის წევრ მ.ა.-ს სისტემატურად ამცირებდა, სიტყვიერ შეურაცხყოფას აყენებდა და ეჭვიანობის მიზეზით, დასახიჩრებით და სიცოცხლის მოსპობით ემუქრებოდა.

19 მარტს, ქ.თბილისში, დ.ა.-მ გენდერის ნიშნით შეუწყნარებლობის მოტივით, მ.ა. ჩაკეტა ბინაში და მის მიმართ უწყვეტად ახორციელებდა ფიზიკურ და ფსიქოლოგიურ ძალადობას", — ვკითხულობთ პროკურატურის განცხადებაში.

უწყების ინფორმაციით, წამებისა და არასასურველი კომუნიკაციის გამო, სავარაუდო დაზარალებულს "ჩამოუყალიბდა ძალადობის განმეორების საფუძვლიანი შიში, იმყოფებოდა მუდმივ სტრესსა და დაძაბულობაში, რის გამოც შეიცვალა საცხოვრებელი ადგილი და შეექმნა სოციალური ქსელის პროფილისა და მობილური ტელეფონის ნომრის შეცვლის რეალური საჭიროება".

კაცს ბრალი გენდერის ნიშნით შეუწყნარებლობის მოტივით ოჯახის წევრის მიმართ ჩადენილი წამების, ძალადობის, მუქარისა და ადევნების ფაქტებზე აქვს წარდგენილი. მას აღკვეთის ღონისძიების სახით პატიმრობა შეეფარდა.