ტელევიზიის ისტორიაში ყველაზე ხანგრძლივი სამედიცინო სერიალის გულშემატკივრებისთვის მშვენიერი სიახლე გვაქვს: მე-17 სეზონი უკანასკნელი სულაც არაა და გრეის ანატომია ტელეეკრანებს მე-18 სეზონითაც დაუბრუნდება. სერიალის ვარსკვლავმა და პროდიუსერმა ელენ პომპეომ ხელშეკრულებას უკვე ხელი მოაწერა.

სერიალის გულშემატკივრები ღელავდნენ, რომ გრეის ანატომია მე-17 სეზონით დასრულდებოდა, რომელშიც კორონავირუსის პანდემიაა ასახული. ელენ პომპეო და შოუს თანაავტორი, კრისტა ვერნოფი ამბობდნენ, რომ შოუს მომავალი უცნობი იყო და მოლაპარაკებები ჯერ კიდევ მიმდინარეობდა.

საბედნიეროდ, გაურკვევლობა უკვე დასრულებულია. ელენ პომპეოსთან ერთად მე-18 სეზონში ჯეიმზ პიკენს უმცროსსა (რიჩარდ ვებერი) და ჩანდრა უილსონსაც (მირანდა ბეილი) ვიხილავთ. გრეის ანატომიის ახალი სეზონის გარდა, სერიალის სპინოფის, Station 19-ის მე-5 სეზონიც დაანონსდა.

"Station 19-მა და გრეის ანატომიამ საზოგადოებისთვის ჩვენი დროის ერთ-ერთი უდიდესი სამედიცინო ისტორიის გამბედავად გაშუქებით რეალური გმირების პატივისცემა საოცრად მოახერხეს... ძალიან მადლიერი ვართ ჩვენი ნიჭიერი მსახიობებისა და გუნდის საოცარი მუშაობისა, რომელიც მაყურებლებს აერთიანებს და მოუთმენლად ველით, თუ როდის გავუზიარებთ გულშემატკივრებს კიდევ უამრავ მნიშვნელოვან მომენტს მომდევნო სეზონში", — აცხადებს კრეიგ ერვიჩი, Hulu Originals-სა და ABC Entertainment-ის პრეზიდენტი.

ჯერჯერობით უცნობია, იქნება თუ არა მე-18 სეზონი საკულტო სერიალის ფინალი.

ამავე თემაზე: