ლიეტუვის საგარეო საქმეთა მინისტრი, გაბრიელიუს ლანდსბერგისი მოუწოდებს რუსეთს, რომ შეასრულოს ცეცხლის შეწყვეტის შესახებ შეთანხმება და გაათავისუფლოს უკანონოდ დაკავებული პირები. გარდა ამისა, მან სოლიდარობა გამოუცხადა საოკუპაციო რეჟიმის მიერ დაკავებული ზაზა გახელაძესა და მის ოჯახს.

საქართველოში ვიზიტის დასასრულ, გაბრიელიუს ლანდსბერგისმა მედიასთან შეხვედრა გამართა და კითხვებს უპასუხა. როგორც მან აღნიშნა, რუსეთის აგრესიული ნაბიჯები ე.წ. ბორდერიზაციის კუთხით და რუსი სამხედროების გაზრდილი ყოფნა ოკუპირებულ ტერიტორიებზე, ნებისმიერ ხელმისაწვდომ ფორმატში იქნება დაგმობილი.

"ჩვენ მოვუწოდებთ რუსეთს, დაუყოვნებლივ გაათავისუფლოს საქართველოს მოქალაქეები, სრულად დაემორჩილოს 2008 წლის ცეცხლის შეწყვეტის შესახებ შეთანხმებას და ასევე ადამიანის უფლებათა ევროპული სასამართლოს 2021 წლის 21 იანვრის გადაწყვეტილებას. ამ კუთხით ჩვენ სრულად სოლიდარობას ვუცხადებთ ზაზა გახელაძესა და მის ოჯახს, ასევე, სხვა უკანონოდ დაკავებულ პირებსა და მათი ოჯახის წევრებს", — აღნიშნა ლიეტუვის საგარეო უწყების ხელმძღვანელმა.

ლანდსბერგისმა აღნიშნა, რომ ლიეტუვა სრულად უჭერს მხარს საქართველოს ევროპულ და ევროატლანტიკურ კურსს და ქართველი ხალხის ნება არასდროს იქნება უგულებელყოფილი.