ლიეტუვის საგარეო საქმეთა მინისტრმა, გაბრიელიუს ლანდსბერგისმა საოკუპაციო ხაზიდან რუსეთს საქართველოს ტერიტორიული მთლიანობის ხელყოფის შეწყვეტისკენ მოუწოდა.

"ოძისთან არსებული ადმინისტრაციული საზღვარი მოვინახულეთ. რუსეთის მუდმივი უკანონო ბორდერიზაციისა და მძიმე სამხედრო ინვესტიციების მოწმე გავხდი. ძლიერ მხარდაჭერას ვუცხადებ ევროკავშირის სადამკვირვებლო მისიას (EUMM). რუსეთს კი მოვუწოდებ საქართველოს ტერიტორიული მთლიანობის დარღევა შეწყვიტოს".

ლიეტუვის საგარეო საქმეთა მინისტრის, გაბრიელიუს ლანდსბერგისის ვიზიტი საქართველოში სამშაბათს, 27 აპრილს სომხეთიდან ჩამოსვლით დაიწყო და ხუთშაბათს, 29 აპრილს, მინისტრის აზერბაიჯანში გამგზავრებით დასრულდება.

ვიზიტის ფარგლებში მინისტრი მთავრობას, ოპოზიციასა და არასამთავრობო ორგანიზაციებს შეხვდა.

მინისტრი ვიზიტს პრესკონფერენციით, შედეგების შეჯამებითა და მედიის მიერ დასმულ კითხვებზე პასუხის გაცემით დაასრულებს.