დაავადებათა კონტროლის ცენტრის დირექტორის, პაატა იმნაძის განცხადებით, სინოფარმზე ყველა ადამიანი არ ელოდება ავტორიზაციის მესამე ფაზის გავლას და ვისაც მისი ეფექტურობის სჯერა, ის აიცრება. ამის შესახებ მან ფორმულას ეთერში ისაუბრა.

"საწყლები ემირატები, როცა არაბეთის ემირატების ემირები იცრებიან, პრემიერმინისტრი აიცრა ემირატების. ერდოღანი სინოვაკით აიცრა, საწყლებს, არ ჰქონდათ კვლევების შედეგები და გაწირეს ხო თავი? კარგით, რა. [...] ვიღაცა ელოდება [ავტორიზაციას], ვიღაცა არ ელოდება. ეს არჩევანის ამბავია, ხომ? ძალაზე ხო არავინ არავის არ ცრის? ვისაც სჯერა, ის აიცრება. ვინც იცის, როგორია ეფექტურობა, იგივე უნგრეთის მონაცემები, იგივე სერბეთის მონაცემები. გვაქვს ეს მონაცემები, ყველაფერი გამოქვეყნებულია, ხომ?", — განაცხადა მან.

თბილისში ჩინური ვაქცინის, Sinopharm-ისთვის განკუთვნილი ადგილები სრულად დაჯავშნილია. რეგისტრაცია დღეს, 27 აპრილს 20:00 საათზე დაიწყო და 2 საათში შეივსო. ვიზიტების დაჯავშნა 4-დან 15 მაისამდე პერიოდში იყო შესაძლებელი.

ჯანდაცვის სამინისტროს ინფორმაციით, სინოფარმის ვაქცინა 35 ქვეყანაშია აღიარებული და ჩინეთის მწარმოებლებს 200 მილიონზე მეტი დოზა აქვთ გაცემული. თუმცა, ამ ეტაპზე ვაქცინას არ აქვს ჯანდაცვის მსოფლიო ორგანიზაციის აღიარება.

გასცემს თუ არა ორგანიზაცია Sinopharm-ის გამოყენების ნებართვას ამ კვირის ბოლოს გახდება ცნობილი, Sinovac Biotech-თან დაკავშირებით კი იგივე ინფორმაციას მომდევნო კვირის ბოლოს მივიღებთ. ამის შესახებ WHO-ს ასისტენტ-დირექტორმა, მარიანგელა ბატისტა გალვაო სიმაომ, ორშაბათს განაცხადა.