საქართველოს პარლამენტის თავმჯდომარის, კახა კუჭავას განცხადებით, რამდენად ნეიტრალური იქნება, ამას საქმე აჩვენებს. ამის შესახებ მან დღეს ჟურნალისტებთან ისაუბრა.

"თქვენ კარგად ხედავდით მოლაპარაკებების პროცესს — ვინ წარმოადგენდა ქართულ ოცნებას, იყო საკმაოდ მყარი დებატები, განხილვები ამ საკითხებზე და რა თქმა უნდა, ეს მხარეები იყვნენ ჩართულები, რომ შეთანხმება ყოფილიყო მიღწეული. მე არ ვიყავი ამ პროცესში ჩართული, ხოლო კითხვა თუ რამდენად ნეიტრალური ვიქნები, ამას, ალბათ, გვაჩვენებს საქმე და თქვენ თვითონ შეაფასებთ შემდეგ, რამდენად შევძლებ მე ამ როლის მორგებას, რომ ვიყო ნეიტრაული და შევძლო ბალანსის დაცვა", — თქვა მან.

კახა კუჭავა პარლამენტის თავმჯდომარედ 86 ხმით 6-ის წინააღმდეგ დაამტკიცეს. პარლამენტის თავმჯდომარეობის კანდიდატად ქართულმა ოცნებამ კახა კუჭავა მას შემდეგ წარადგინა, რაც არჩილ თალაკვაძემ თანამდებობა დატოვა. თალაკვაძემ წასვლის მიზეზად ის დაასახელა, რომ აქტიურად იყო ჩართული მოლაპარაკებების პროცესში როგორც მხარე, პარლამენტის თავმჯდომარე კი მიუკერძოებელი უნდა იყოს. კობახიძემ ხაზი გაუსვა იმ ფაქტს, რომ თალაკვაძემ ეს გადაწყვეტილება თავად მიიღო.