საქართველოს პარლამენტის წევრის, სალომე სამადაშვილის განცხადებით, ახლა მნიშვნელოვანია, რომ შეთანხმების გეგმას მიყვნენ. ამის შესახებ მან ოპოზიციასა და ქართულ ოცნებას შორის მიმდინარე შეხვედრის დასრულების შემდეგ ისაუბრა.

"ამ ეტაპზე ჩვენთვის მნიშვნელოვანია ის, რომ მივყვეთ შეთანხმების გეგმას, ამ შეთანხმების მოყვანა და განხორციელება სისრულეში და მისი ეტაპობრივი შესრულება. ეს არის უკიდურესად მნიშვნელოვანი ჩვენი ქვეყნისთვის, ამიტომ ჩვენ ხვალიდან ვიწყებთ პირველი ნაბიჯების გადადგამს. ამნისტიის კანონპროექტი არის რთული თემა და ხვალ გავაგრძელებთ ამაზე კონსულტაციებს", — თქვა მან.

დღეს, 26 აპრილს ნაციონალური მოძრაობის თავმჯდომარემ, ნიკა მელიამ განცხადება გაავრცელა, სადაც ის მზადყოფნას გამოთქვამს ევროკავშირის მიერ გადახდილი გირაოთი გათავისუფლებაზე, იმ შემთხვევაში, თუ ამნისტიის კანონს უკან გაითხოვენ.

დოკუმენტში, რომელიც ევროპული საბჭოს პრეზიდენტის, შარლ მიშელის ინიციატივით შემუშავდა წერია, რომ მხარეებმა ხელმოწერიდან ერთი კვირის ვადაში, "პოლიტიზებულ მართლმსაჯულებად" აღქმულ ორ საკითხზე რეაგირება უნდა მოახდინონ ამნისტიის საშუალებით და/ან ისეთი ზომების მიღებით, რომელიც ანალოგიურ შედეგს გამოიღებს.

ამნისტიის საკითხს მოყვა არაერთი კითხვა იმაზე, თუ ვის შეეხება ეს კანონი. კერძოდ, სამოქალაქო საზოგადოებისა და ოპოზიციის ნაწილი წინააღმდეგია, რომ ის გავრცელდეს სამართალდამცავები უწყების წარმომადგენლებზეც, რომლებიც აქციის დაშლაში მონაწილეობდნენ. პარლამენტის თავმჯდომარის, არჩილ თალაკვაძის განცხადებით, ამნისტიის კანონი ზუსტად იმ პირობებით მიიღება, რაც შეთანხმებაშია. მისი თქმით, ქართულ ოცნებას ამ საკითხზე "არავითარი სუბიექტური ინტერესი" არ გააჩნია.

27 აპრილს, სამშაბათს, ოპოზიცია პარლამენტში შევა იმისთვის, რომ ამნისტიის შესახებ კანონი დაარეგისტრიროს. ამნისტია შეეხება ნაციონალური მოძრაობის თავმჯდომარეს, ნიკა მელიას. პროექტის დარეგისტრირების შემდეგ, ამავე დღეს პრეზიდენტი გიორგი რურუას შეწყალების აქტს გამოსცემს.

გაიგეთ მეტი: