საქართველოს პარლამენტის დეპუტატი, ალეკო ელისაშვილი აცხადებს, რომ პარლამენტის თავმჯდომარეობის კანდიდატის, კახა კუჭავას საწინააღმდეგო არაფერი აქვს.

"არ ვიცი, თალაკვაძის ამ როტაციის მიზეზი რა იყო. რაც მოვისმინე, ის სიმართლეს ჰგავს, რომ უნდათ უფრო ნეიტრალური ადამიანის ყოფნა, რომ ხვალიდან ოპოზიციის დიდი ნაწილი შემოვა, შემდეგ კიდევ ერთი ნაწილი შემოვა და ძალიან ადუღდება პარლამენტი და იქ სპიკერი და თავმჯდომარე თუ იქნება უფრო ნეიტრალური ადამიანი, საქმისთვის კარგია. თუ ეს ასე არის და უფრო მიდრეკილივი ვარ, რომ ეს ასე არის, რადგან სხვა ვერსია სიმართლესთან მიდრეკილი არ გამიგია.

კუჭავას საწინააღმედგო მე პირადად არაფერი არ მაქვს. რასაც ვიცნობ და რაც მისი ბიოგრაფია ვიცი, ვერაფერზე ვერ იტყვი, რომ არიქა, ადგე და გაილაშქრო. დიდი ალბათობით, ჩვენ ვფიქრობთ ამაზე [მხარდაჭერაზე]. დღეს პარლამენტის თავმჯდომარედ უფრო ნეიტრალური ადამიანის დანიშვნა არის სწორი. კახა კუჭავა არის უფრო ნეიტრალური პოლიტიკურად. რასაც ვეთანხმებით, იმას მხარი რატომ არ უნდა დავუჭიროთ?", — განაცხადა ელისაშვილმა. .

პარლამენტის თავმჯდომარეობის კანდიდატად ქართულმა ოცნებამ კახა კუჭავა წარადგინა. ის არჩილ თალაკვაძეს შეცვლის, რომელმაც თავმჯდომარის თანამდებობა ახლახანს დატოვა და პარლამენტის ვიცე-სპიკერი გახდა.