პარტია ლელოს ლიდერის, მამუკა ხაზარაძის განცხადებით, ის ნაციონალური მოძრაობის თავმჯდომარის, ნიკა მელიას პოზიციას "პატივს სცემს", მაგრამ შეთანხმებაში ჩამოთვლილი "სახელმწიფოებრივი საკითხები" მხოლოდ "მელიას თემაზე ვერ დავიდოდა". მისი თქმით, საჭიროა ოქროს შუალედის პოვნა. ამის შესახებ მან TV პირველის ეთერში ისაუბრა.

"მინდა ძალიან მკაფიოდ ვთქვა, თვითონ ჩვენი ეს ძალისხმევა, ჩემი პირადი, ბადრი, ჩვენი და სხვა ოპოზიციური პარტიების, იმით არის განპირობებული, რომ ამ ქვეყანაში პოლიტიზირებული მართლმსაჯულება დამთავრდეს, მაგრამ მოდით, ნუ დაგვავიწყდება, მე პატივს ვცემ ნიკას და მის პიროვნულ პოზიციას, გასაგებია, ეს მისი პოზიციაა და პატივს ვცემ, მაგრამ ნუ დაგვავიწყდება, რომ მარტო ნიკა მელიას თემას არ განვიხილავთ ამ ხელშეკრულებაში.

ჩვენ ვლაპარაკობთ ძალიან ბევრ სახელმწიფოებრივ საკითხზე და შესაბამისად, სახელმწიფოებრივი საკითხები, ისეთი როგორიც არის, სასამართლო რეფორმა, საარჩევნო რეფორმა და იმ ხელშეკრულებაში ჩამოთვლილი სხვადასხვა საკითხი ვერ დავიდოდა მარტო ნიკა მელიას თემაზე.

ჩვენ უნდა ვნახოთ ოქროს შუალედი, სადაც სახელმწიფოებრივ საკითხებს ქვეყანაში სიმშვიდეს, სტაბილურობას არ დავუპირისპირებთ მარტო ეს საკითხს, რაც არ უნდა მნიშვნელოვანი საკითხი იყოს. ამიტომ, ჩვენი ძალისხმევა სწორედ იმით არის განპირობებული, რომ ეს საკითხი მოვაგვაროთ, მაგრამ ვერანაირად უარს ვერ ვიტყვით იმაზე, რაზეც ხელი მოვაწერეთ", — თქვა მან.

19 აპრილს ევროპული საბჭოს პრეზიდენტის, შარლ მიშელის ახალ დოკუმენტს შვიდმა პოლიტიკურმა პარტიამ და რამდენიმე დამოუკიდებელმა დეპუტატმა მოაწერა ხელი. ხელმოწერის ცერემონია პრეზიდენტის სასახლეში გაიმართა და ონლაინ-რეჟიმში თავად მიშელიც დაესწრო.

დოკუმენტზე ხელმოწერაზე უარი თქვეს ნაციონალურმა მოძრაობამ და ევროპულმა საქართველომ. ასევე, ლეიბორისტულმა პარტიამ. თუმცა, აღსანიშნავია, რომ ამ პარტიებიდან ცალკეულმა დეპუტატებმა დოკუმენტს ხელი ინდივიდუალური გადაწყვეტილების საფუძველზე მოაწერეს.

გაიგეთ მეტი: