სააგენტო გურია ნიუსის ინფორმაციით, მათი ვებსაიტი ჰაკერული თავდასხმის შედეგად დაზიანებულია. როგორც გამოცემაში აცხადებენ, ჰაკერული თავდასხმა 21 თებერვალს, 3 საათზე განხორციელდა, შედეგად წაშლილია საიტზე 2011 წლიდან დღემდე ატვირთული მასალები. დაზიანებულია მონაცემთა ბაზაც. ჯერჯერობით უცნობია, მთლიანად რა მოცულობის მონაცემებს მიადგა ზიანი, აღნიშნულს სპეციალისტები არკვევენ. როგორც გურია ნიუსში აცხადებენ, აპირებენ მიმართონ საგამოძიებო ორგანოებს.

გურია ნიუსის დამფუძნებელი, ია მამალაძე ფეისბუკ გვერდზე წერს, რომ შეტევა ერთი კვირის განმავლობაში გრძელდებოდა:

"ჰაკერშტევა მედიასაშუალების წინააღმდეგ ერთ კვირაზე მეტია მიმდინარეობს და ვცდილობდით საკუთარი ძალებით, რაც ჩვენს შეზღუდულ ფინანსურ და ტექნიკურ შესაძლებლობას შეეფერება, გავმკლავებოდით, მაგრამ გურია ნიუსის ინტერნეტრესურსის განადგურების სურვილი, ძალისხმევა იმდენად დიდი იყო, რომ დაინტერესებული პირების თუ ჯგუფის მასირებული შეტევა ბაზების, ინფორმაციის, ვების სტრუქტურის განადგურებით დასრულდა.

მცირე რესურსების მქონე მედიასაშუალებისთვის, რომელიც უკვე 25 წელზე მეტია, თავდაუზოგავი შრომით, თავგანწირვით, პროფესიული ერთგულებით, თეთრ-თეთრ შეგროვებული საკუთარი და არა რომელიმე პოლიტიკური ძალის სახსრებით ცდილობს შემორჩეს მედიაბაზარს, ეს დიდი დარტყმაა, რომელიც ყოფნა-არყოფნის ზღვარზე გვაყენებს!
გურია ნიუსი მიმართავს ყველა სამართალდამცავ, სახელმწიფო სტრუქტურას, პირველ რიგში, კიბერუსაფრთხოების სამსახურს, ვისაც ევალება ამგვარი დანაშაულის პრევენცია, გამოძიება, ერთხელ მაინც ამ ქვეყანაში უზრუნველყონ უსაფრთხოების, სამუშაო გარემოს, საკუთრების დაცვის, მედიის განვითარების ფუნდამენტური უფლებები და გამიძიონ მომხდარი დანაშაული!"

ია მამალაძის თქმით, ისინი ყველაფერს გააკეთებენ, რათა მკითხველს უმოკლეს ვადაში დაუბრუნდნენ.