ქართული ოცნების ერთ-ერთმა დეპუტატმა, ლადო კახაძემ განაცხადა, რომ ყოფილი პრემიერმინისტრის, გიორგი გახარიას "კრიზისმენეჯერობას" უარყოფითად ვერ შეაფასებს. ამის შესახებ მან On.ge-სთან საუბარში განაცხადა.

"ადამიანები თავის სამოქმედო გეგმას თვითონ ირჩევენ და თავის პოლიტიკურ აქტივობებს თვითონ ირჩევენ, მე ვერ ვუკარნახებ, გამორიცხულია, ცალსახად. მაგრამ მართვის იმ ფორმას, რომელიც კონსილიუმის სტილს წარმოადგენს, ყოველთვის მივესალმები. საქართველომ იმ პერიოდში როგორ გაიარა ის პირველი ფაზა, როგორი იყო მეორე ფაზაში გადასვლის პერიოდი, რესურსების გამოყენება. ის, რომ ყველამ ერთად იმოქმედა. ის დაეყრდნო ექიმების რჩევებს, ეპიდემიოლოგებს, ინფექციონისტებს, რავიცი, როგორ გითხრათ, მე როგორც ჩვეულებრივ მოსახლეს, უარყოფითი შეფასება არ შემიძლია", — განაცხადა კახაძემ.

ქართული ოცნების დეპუტატი, კახი კახიშვილი ყოფილ პრემიერმინისტრს, გიორგი გახარიას აკრიტიკებს და აცხადებს, რომ ის არ იყო კარგი კრიზისმენეჯერი პანდემიის მართვის პერიოდში.

გადადგომის შემდეგ, გიორგი გახარია პირველი საჯარო კომენტარი 22 მარტს გააკეთა და თქვა, რომ არსად წასვლას არ აპირებს და პოლიტიკაში რჩება. რამდენიმე საათში იმავე შინაარსის წარწერით მან ოფიციალურ ფეისბუქგვერდზე ფოტო გამოაქვეყნა. იმავე საღამოს კი მან ტვიტერზე დაპოსტა, რომ პოლიტიკური დღის წესრიგის შექმნაზე მუშაობს.

14 აპრილს, ქართული ოცნების ექვსმა დეპუტატმა პარტია დატოვა და ყოფილი პრემიერმინისტრის, გიორგი გახარიას "პარტიის მშენებლობის ახალ ეტაპზე" უერთდებიან. ესენი არიან:

  1. გიორგი ხოჯევანიშვილი;
  2. მიხეილ დაუშვილი;
  3. ანა ბუჩუკური
  4. ალექსანდრე მოწერელია;
  5. ბექა ლილუაშვილი;
  6. შალვა კერესელიძე

ისინი ამბობენ, რომ იზიარებენ ქართული ოცნებების წარმატებებსა და წარუმატებლობებს, ამავე დროს კი, გრძნობენ პასუხისმგებლობას შეცდომებზეც და სწორედ ამ პასუხისმგებლობის გრძნობით დგამენ ამ ნაბიჯს.