პარლამენტი საგზაო მოძრაობის შესახებ კანონში დაგეგმილი ცვლილებების და მასთან დაკავშირებული კანონპროექტების განხილვას უბრუნდება. საკანონმდებლო პაკეტს დღეს, 20 თებერვალს, იურიდიულ საკითხთა კომიტეტის სხდომაზე განიხილავენ. მომხსენებელი შინაგან საქმეთა მინისტრის მოადგილე შალვა ხუციშვილი იქნება.

კანონპროექტით გათვალისწინებულია მართვის მოწმობაზე 100-ქულიანი სისტემის შემოღება, რომლის განულების შემთხვევაში მძღოლს მოწმობა გაუუქმდება და მას გამოცდის ხელახლა ჩაბარება მოუწევს.

საგზაო მოძრაობის უსაფრთხოების რეფორმის ფარგლებში, ასევე იგეგმება მართვის მოწმობის გამოცდის რეალურ დროში ჩაბარება, რაც პრაქტიკული გამოცდის ქუჩაში ჩატარებას გულისხმობს.

ასევე, კანონში დაგეგმილი ცვლილება ითვალისწინებდა მარჯვენასაჭიანი და საჭეგადატანილი მანქანების რეგისტრაციის აკრძალვას, თუმცა კანონპროექტთა პაკეტიდან შინაგან საქმეთა სამინისტრომ აღნიშნული მუხლი ამოიღო.