პოლიცია გუმათჰესთან შეკრებილ აქტივისტებს მოუწოდებს შეწყვიტონ მათ მიერ აღმართულ ბარიკადებზე "ბრახუნი და აგრესია", წინააღმდეგ შემთხვევაში კი აფრთხილებს, რომ გამოიყენებს "პროპორციულ ძალას".

"დაემორჩილეთ კანონიერ მოთხოვნებს პოლიციის და ეს ბრახუნი და აგრესია შეწყვიტეთ, წინააღმდეგ შემთხვევაში გამოვიყენებთ პროპორციულ, სამართლებრივ ძალას", — უთხრა აქტივისტებს სულხან თამაზაშვილმა, იმერეთის რაჭა-ლეჩხუმისა და ქვემო სვანეთის პოლიციის დეპარტამენტის დირექტორმა.

ფოტო: ანა ვახტანაგაძე/On.ge

"ბატონო სულხან, მარტო ულტიმატუმისთვის მოხვედით, თუ მოგვისმენთ ჩვენც?", — ჰკითხა პოლიციის უფროსს ერთ-ერთმა აქტივისტმა, მირზა ნოზაძემ.

ნოზაძე ამბობს, რომ ბარიკადებზე "დოლის დაკვრით" პროტესტს გამოხატავენ და არა აგრესიას. იმისათვის რომ სიტუაცია მშვიდობიანად, ერთობლივად ემართათ, აქტივისტმა პოლიციელს სთხოვა აეხსნა მათთვის, რომელი კანონის საფუძველზე ეკრძალებოდათ ხმაური. პოლიციის უფროსმა უპასუხა, რომ ბარიკადები სწორედ პროცესის მშვიდობიანად სამართავად აღმართეს და მასზე ბრახუნი აგრესიის გამოხატვაა.

გუმათჰესის მიმდებარე ტერიტორიაზე, სოფელ ნამოხვანისკენ მიმავალ გზაზე პოლიციამ რკინის ბარიკადები აღმართა. როგორც ადგილზე მყოფი On.ge-ს ჟურნალისტი გვეუბნება, ამ ფაქტმა მოსახლეობის და ადგილობრივი აქტივისტების უკმაყოფილება გამოიწვია, რის გამოც ისინი დილიდან რკინის ჯებირებზე აბრახუნებენ და ხმაურობენ.