საქართველოს პრეზიდენტის, სალომე ზურაბიშვილის განცხადებით, დრო მოვიდა, რომ სიძულვილისა და შეურაცხყოფის ენაზე მორატორიუმი გამოვაცხადოთ. ამის შესახებ მან ორბელიანის სასახლეში საქართველოს დამოუკიდებლობის აღდგენის 30 წლისთავისადმი მიძღვნილ ღონისძიებაზე ისაუბრა.

"მეორე ინიციატივა, რომელიც დღევანდელ დღეს შეამშვენებს და საჭირო არის ყველასთვის, ეს არის არა ჩემი, არამედ საზოგადოების მოთხოვნა და მე მინდა, თქვენი საშუალებით, თქვენ და სხვა პოლიტიკურ პარტიებს, რომლებიც აქ არ იმყოფებიან დღეს, გადავცეთ — მგონი, დრო მოვიდა მორატორიუმის გამოცხადების სიძულვილის და შეურაცხყოფის ენაზე", — თქვა მან.

მისი თქმით, საქართველო განწყობებისა და ატმოსფეროს ქვეყანაა, ამიტომ თუ ეს განწყობები შეიცვლება, ერთმანეთს სხვანაირად შეხედავენ, რაც მისი განცხადებით, ყველას გააძლიერებს.