საქართელოში ამერიკის შეერთებული შტატების საელჩო გმობს ტელეკომპანია ფორმულას თანამშრომლებზე გუშინ განხორციელებულ თავდასხმისა და ვანდალიზმის ფაქტს.

საელჩოში აცხადებენ, რომ ამას წინ უსწრებდა, თებერვალში, ფორმულას ჟურნალისტის ვახო სანაიას ცემის ინციდენტი. საელჩო ხელისუფლებას ამ შემთხვევების სწრაფი, სრულყოფილი და მიუკერძოებელი გამოძიების ჩატარებისკენ მოუწოდებს.

"თავდასხმა ჟურნალისტებზე მიუღებელია. დემოკრატიულ სახელმწიფოებში ჟურნალისტებს უნდა ჰქონდეთ თავისუფლება და შეეძლოთ საქმიანობის უსაფრთხოდ განხორციელება. სასიცოცხლოდ მნიშვნელოვანია, რომ მათ შესძლონ სამსახურებრივი მოვალეობების შესრულება საზოგადოების ინფორმირების, სახელმწიფო ინსტიტუციებისა და მთავრობის ანგარიშვალდებულების უზრუნველსაყოფად", — ნათქვამია საელჩოს განცხადებაში.

ფორმულაში თანამშრომლებზე თავდასხმას ტელევიზიაში მათ პროფესიულ საქმიანობას უკავშირებენ. ტელეკომპანიაში აცხადებენ, რომ ეს არ იყო ჩვეულებრივი კრიმინალური შემთხვევა და მანქანიდან არც არაფერი არის წაღებული.

"თავდასხმის დროს ადგილი ჰქონდა გარკვეული სიტყვებისა და ტერმინების გამოყენებას, რომელიც პირდაპირ მიგვანიშნებს, რომ მის პროფესიულ საქმიანობას უკავშირდებოდა", — განაცხადა ტელევიზიის სპეციალურ ბრიფინგზე, გიორგი თარგამაძემ.

ფორმულას დირექტორის, ზუკა გუმბარიძის თქმით, ერთ-ერთ მძღოლ არჩილ ტიბუნაშვილს ღამის 3 საათზე, კომენდანტის საათის დროს დაესხნენ თავს. მეორე მძღოლის ვინაობა კი მისივე სურვილით, უსაფრთხოებიდან გამომდინარე არ დაასახელეს, თუმცა დირექტორმა აღნიშნა, რომ შესაბამის უწყების წარმომადგენლებს გამოძიებისთვის ინფორმაციას მიაწვდიან.

ეს არ არის პირველი შემთხვევა, როცა ფორმულას თანამშრომლებს თავს ესხმიან. 25 თებერვალს თავს დაესხნენ ჟურნალისტ ვახო სანაიას, რომელსაც ტვინის შერყევა დაუდასტურდა. სანაია ამბობს, რომ თავდამსხმელებისგან პირდაპირი აგრესია იგრძნობოდა ტელევიზიების, განსაკუთრებით კი, კრიტიკული მედიის წარმომადგენლების მიმართ.

შინაგან საქმეთა სამინისტროში ფორმულას თანამშრომლებზე განხორციელებულ თავდასხმაზე აცხადებენ, რომ სოფელ გამარჯვებაში ერთ-ერთი მოქალაქის კუთვნილი ავტომობილის დაზიანების შესახებ გამოძიება შეტყობინების მიღებისთანავე დაიწყეს. რაც შეეხება მეორე დაზარალებულს, უწყებაში ამბობენ, რომ აღნიშნულთან დაკავშირებით შეტყობინება არ შესულა.