შინაგან საქმეთა სამინისტროში ფორმულას თანამშრომლებზე განხორციელებულ თავდასხმაზე აცხადებენ, რომ სოფელ გამარჯვებაში ერთ-ერთი მოქალაქის კუთვნილი ავტომობილის დაზიანების შესახებ გამოძიება შეტყობინების მიღებისთანავე დაიწყეს. რაც შეეხება მეორე დაზარალებულს, უწყებაში ამბობენ, რომ აღნიშნულთან დაკავშირებით შეტყობინება არ შესულა.

"გამოიკითხა ავტომობილის მფლობელი, რომელმაც აღნიშნა, რომ არის ტელეკომპანია ფორმულას მძღოლი. მომხდარ ფაქტზე გამოძიება სისხლის სამართლის კოდექსის 187-ე მუხლით [ნივთის დაზიანება ან განადგურება] მიმდინარეობს. რაც შეეხება მეორე ფაქტს, რაზეც ტელეკომპანია ფორმულა საუბრობს, შსს-ში აღნიშნულ ფაქტთან დაკავშირებით შეტყობინება არ შესულა, ინფორმაციის მიღებისთანავე, უწყება მოახდენს შესაბამის სამართლებრივ რეაგირებას", — აცხადებენ შსს-ში.

ფორმულაში თანამშრომლებზე თავდასხმას ტელევიზიაში მათ პროფესიულ საქმიანობას უკავშირებენ. ტელეკომპანიაში აცხადებენ, რომ ეს არ იყო ჩვეულებრივი კრიმინალური შემთხვევა და მანქანიდან არც არაფერი არის წაღებული.

"თავდასხმის დროს ადგილი ჰქონდა გარკვეული სიტყვებისა და ტერმინების გამოყენებას, რომელიც პირდაპირ მიგვანიშნებს, რომ მის პროფესიულ საქმიანობას უკავშირდებოდა", — განაცხადა ტელევიზიის სპეციალურ ბრიფინგზე, გიორგი თარგამაძემ.

ფორმულას დირექტორის, ზუკა გუმბარიძის თქმით, ერთ-ერთ მძღოლ არჩილ ტიბუნაშვილს ღამის 3 საათზე, კომენდანტის საათის დროს დაესხნენ თავს. მეორე მძღოლის ვინაობა კი მისივე სურვილით, უსაფრთხოებიდან გამომდინარე არ დაასახელეს, თუმცა დირექტორმა აღნიშნა, რომ შესაბამის უწყების წარმომადგენლებს გამოძიებისთვის ინფორმაციას მიაწვდიან.

ეს არ არის პირველი შემთხვევა, როცა ფორმულას თანამშრომლებს თავს ესხმიან. 25 თებერვალს თავს დაესხნენ ჟურნალისტ ვახო სანაიას, რომელსაც ტვინის შერყევა დაუდასტურდა. სანაია ამბობს, რომ თავდამსხმელებისგან პირდაპირი აგრესია იგრძნობოდა ტელევიზიების, განსაკუთრებით კი, კრიტიკული მედიის წარმომადგენლების მიმართ.