მიანმარის ელჩს დიდ ბრიტანეთში ღამის გათენება მანქანაში მოუწია, რადგან საელჩოში არ შეუშვეს. როგორც ელჩი ამბობს, სამხედრო ატაშემ მოითხოვა თანამშრომლებისგან შენობა დაეტოვებინათ, ხოლო ის ქვეყნის წარმომადგენლის პოსტიდან გაათავისუფლეს.

თებერვალში გადატრიალების შედეგად მიანმარის ხელისუფლება ხელში სამხედრო ხუნტამ ჩაიგდო. ქვეყნის ელჩი დიდ ბრიტანეთში აკრიტიკებდა გადატრიალებას და ქვეყნის ფაქტობრივი ლიდერის, აუნ სან სუ ჩის გათავისუფლებას მოითხოვდა.

ოფიციალური წარმომადგენლის საშუალებით უკვე ყოფილმა ელჩმა მოუწოდა დიდი ბრიტანეთის ხელისუფლებას, არ ცნოს ხუნტის მიერ დანიშნული ელჩი და ის უკან, მიანმარში გააბრუნოს.

"თებერვალში გადატრიალება იყო მიანმარში. ახლა იგივე სიტუაციაა ლონდონის ცენტრში", — თქვა მან და დაამატა, რომ საელჩოს თანამშრომლებს ემუქრებიან, თუ ისინი გენერალზე არ იმუშავებენ.

ვენეციის კონვენციის თანახმად, ელჩის მუშაობა ოფიციალურად წყდება მას შემდეგ, რაც ამის შესახებ მასპინძელი ქვეყანა მიიღებს ინფორმაციას. დიდი ბრიტანეთის საგარეო საქმეთა სამინისტროში დაადასტურეს, რომ შეტყობინება მიაწოდეს და უნდა მიიღოს "მიანმარის ხელისუფლების მიერ მიღებული გადაწყვეტილება".

Reuters-ის ინფორმაციით, ელჩის მოვალეობას ამ დროისთვის მოადგილე, ჩიტ ვინი ასრულებს, თუმცა ბრიტანეთის საგარეო უწყებაში ამბობენ, რომ ინფორმაცია ჯერ არ მიუღიათ. საგარეო საქმეთა მინისტრმა, დომინიკ რააბმა "დაშინების პოლიტიკა" დაგმო.