აიანა უილიამსს ამიერიდან კარის გაღება, ჭურჭლის გარეცხვა და სხვა აქტივობების შესრულება აღარ გაუჭირდება — უილიამსმა, რომელიც გინესის მსოფლიო რეკორდების წიგნში ყველაზე გრძელი ფრჩხილების მქონე ქალის სახელითაა შესული, ფრჩხილები თითქმის 30 წლის შემდეგ პირველად მოიჭრა.

აიანა უილიამსი გინესის მსოფლიო რეკორდების წიგნში 2017 წელს შევიდა. მისი ფრჩხილების საერთო სიგრძე ჯამში 576,4 სანტიმეტრი იყო. მას ფრჩხილების მოსაწესრიგებლად 20 საათი და 2 ბოთლი ფრჩხილის ლაქი დასჭირდა. მოჭრამდე უილიამსმა ფრჩხილები ხელახლა გაიზომა. მათი საერთო სიგრძე თითქმის 733 სანტიმეტრი იყო.

აიანა უილიამსმა 1990-იანი წლების შემდეგ ფრჩხილები პირველად მოიჭრა. მოჭრილი ფრჩხილები ფლორიდაში, Ripley's Believe It or Not! მუზეუმში გამოიფინება.