რუსეთის პრეზიდენტმა, ვლადიმერ პუტინმა ხელი მოაწერა კანონს, რომელიც კიდევ ორი ვადით პრეზიდენტობის უფლებას აძლევს. კანონი საკონსტიტუციო ცვლილებების შესაბამისად მიიღეს, რომელიც, ასევე, პუტინის ინიციატივით განხორციელდა.

აღნიშნული კანონის თანახმად, პრეზიდენტი ვეღარ გახდება პირი, რომელსაც ეს პოსტი ორჯერ უკვე ეკავა. ამავე დროს, აღნიშნული კანონით არ ითვლება წინა პრეზიდენტების ვადები. ამიტომაც ვლადიმერ პუტინსაც და დმიტრი მედვედებსაც კენჭისყრა კვლავ შეუძლიათ. სურვილის შემთხვევაში, პუტინს შეუძლია პრეზიდენტი 2036 წლამდე იყოს.

ამის გარდა, კანონში ჩაიწერა, რომ რუსეთის პრეზიდენტი ვერ გახდება პირი, რომელსაც ოდესმე მეორე მოქალაქეობა ან უცხოეთში ბინადრობის უფლება ჰქონია.

ვლადიმერ პუტინმა საკონსტიტუციო ცვლილებები გასული წლის იანვარში წარადგინა. ნორმა ვადების "განულებასთან" დაკავშირებით, რომელიც თეორიულად პუტინს საშუალებას აძლევს ხელისუფლებაში კიდევ 12 წელი დარჩეს, განხილვების დროს გაჩნდა.