1 წელზე მეტია, რაც აშშ-ის დედაქალაქში მცხოვრები ადამიანები, რომელთათვისაც კვირაობით ეკლესიაში სიარული ყოველდღიურობის განუყოფელი ნაწილია, დედაქალაქის ბაპტისტურ ეკლესიაში ღვთისმსახურებას ონლაინ რეჟიმში ესწრებიან. დამსწრეთა ნაწილი საშინაო ტანსაცმლით ერთვება, თუმცა მათ რიცხვს 82 წლის ლა ვერნ ფორდ უიმბერლი ნამდვილად არ მიეკუთვნება. ონლაინ რეჟიმის მიუხედავად, ქალი ყოველ კვირა დილით ელეგანტურად ჩაცმულია, რის დასადასტურებლადაც ღვთისმსახურების შემდეგ სელფებს საკუთარ ფეისბუქზე დებს.

"20 წლის განმავლობაში, რაც ამ ეკლესიაში დავდივარ, ყოველთვის მქონდა პატარა რუტინა, რომელიც ბავშვობაში დედაჩემისგან ვისწავლე. ამოვირჩევდი კარგ ტანსაცმელსა და ქუდს და წინა ღამით გავამზადებდი, რათა მომზადებული და წარმოსადეგი ვყოფილიყავი", — ამბობს უიმბერლი The Washington Post-თან საუბარში.

ფოტო: La Verne Ford Wimberly

უიმბერლის ეკლესიაში გამორჩეული ჩაცმულობის წყალობით, ყველა კარგად იცნობს. პანდემიის დაწყების შემდეგ, ქალმა გადაწყვიტა, საკუთარი ჩვეულებისთვის არ ეღალატა და 2020 წლის მარტიდან დღემდე ყოველ კვირა დილას ელეგანტურად ჩაცმული ეგებება.

ფოტო: La Verne Ford Wimberly

ფოტოების გამოქვეყნების შემდეგ ქალმა დადებითი გამოხმაურება მიიღო. საბოლოოდ, გადაწყვიტა, ელეგანტურად ჩაცმა რუტინად ექცია. მალე კი უკვე მორგებული ტანსაცმლის ჩამოწერაც დაიწყო, რათა ყოველ კვირას ახალი ჩაცმულობით შეხვედროდა.

უიმბერლის დიდი იმედი აქვს, რომ მალე ღვთისმსახურებაზე დასწრებას პირადადაც შეძლებს, მანამდე კი ელეგანტურ სამოსს თავის გულშემატკივრებს სოციალურ ქსელში გაუზიარებს.