დაავადებათ კონტროლის ეროვნული ცენტრის ხელმძღვანელის, ამირან გამყრელიძის განცხადებით, კლასტერული შემთხვევების ტენდენცია გამოჩნდა აჭარა ტექსტილში, კასპის რაიონში, ცაგერში და ჯგუფური შემთხვევები იმერეთის რამდენიმე მუნიციპალიტეტში.

მისივე თქმით, ეპიდემიოლოგიური მდგომარეობის გაუარესების ტენდენცია ბოლო 2 კვირა შეიმჩნევა. ამიტომ ის მოსახლეობას რეკომენდაციების მაქსიმალურად დაცვისკენ მოუწოდებს.

"კარგია, რომ ბოლო 2 დღეა სერიოზულად ინტევსივდება აცრის რაოდენობა ქვეყანაში. გუშინწინ იყო ეს 700-ზე მეტი, გუშინ 1 000-ზე მეტი აიცრა, მაგრამ სანამ ეს კუმულაციური იმუნიტეტი დაგროვდება ქვეყანაში, მანამ ერთადერთი დაცვის საშუალება არის პირბადე, დისტანცია და დიდი თავშეყრების თავის არიდება. არავის არ ვაშინებ, მაგრამ დღევანდელი ეპიდსიტაუცია მაგონებს, დაახლოებით, იმ ეპიდსიტუაციას, რაც ჩვენ გვქონდა სექტემბრის ბოლოს-ოქტომბრის დასაწყისში და თუ ჩვენ არ დავიცავთ რეკომენდაციებს, არ არის გამორიცხული, შევიდეთ მესამე ტალღაში.

გამოჩნდა ტენდენცია კლასტერული შემთხვევების, რომელიც პირველი ნიშანია, რომ შემოკრა განგაშის ზარს გონგი. გვაქვს კლასტერული მცირე ეპიდაფეთქებები აჭარა ტექსტილში, კასპის რაიონში, ცაგერში და იმერეთის რამდენიმე მუნიციპალიტეტში ჯგუფური შემთხვევები", — განაცხადა გამყრელიძემ.

31 მარტის მონაცემებით, კორონავირუსის 616 ახალი შემთხვევა გამოვლინდა, ხოლო 5 ადამიანი გარდაიცვალა. ამასთან, გამოჯანმრთელდა 268 პაციენტი.

ბოლო 24 საათში ქვეყნის მასშტაბით ჩატარდა 31 947 კვლევა ტესტით, მათ შორის 20 364 კვლევა ანტიგენის ტესტით და 11 583 PCR ტესტით.

ქვეყანაში პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 281 761-ს. დღემდე ვირუსს ჯამში 3 778 პირი ემსხვერპლა.