პოლიტიკური მოძრაობა დროას ლიდერის, ელენე ხოშტარიას განცხადებით, სამწუხაროა, რომ მოლაპარაკებები ვერ შედგა, მაგრამ უფრო სამწუხარო შეთანხმების იმიტაცია იქნებოდა. ამის შესახებ მან საკუთარ ფეისბუქზე დაპოსტა.

"მაგალითად, თავის მოტყუება, რომ პოლიტიკური დევნა კი არის, მაგრამ ახლა ორივეს ხომ ვერ გამოუშვებს. დევნა კი არის, მაგრამ ცოტა წავიდეთ კომპრომისზე და ცოტა დევნა იყოს და ბევრი არა. ერთი გამოუშვას და მეორე არა. ანუ დევნა იყოს, ოღონდ ცოტა. ანუ თქვენ რომ ხვალ უსამართლოდ დაგიჭირონ, შეიძლება ცოტა კატეგორიაში მოხვდეთ და იჯექით. ეგ არის ვაჭრობა და პოლიტიკური თამაში.

რაც შეეხება არჩევნებს. ვთქვათ ვერ ვთანხმდებით რა მასშტაბით გაყალბდა (რომ გაყალბდა არავინ უარყოფს). დავანებოთ ამას თავი. ქვეყანაში კრიზისი არის თუ არა? ვინმე იტყვის არაო? აი, თქვენ თავთან, თქვენთვის რომ ფიქრობთ, არის კრიზისი თუ არა? ყველა ნორმალურ ქვეყანაში კრიზისის აღქმა არის საფუძველი არჩევნებზე ლაპარაკის.
ამ ორ საკითხს თუ არ გავეცით პასუხი ვინმე სერიოზულად ფიქრობს, რომ 5 წელიწადში პროკურორის არჩევის წესის გამო უნდა ვთქვათ, რომ კრიზისი გადავლახეთ? თუ ცესკოს თავმჯდომარის მოადგილე რომ დაინიშნება ოპოზიციიდან, ამით მოვიტყუოთ თავი?

ამით არაფერი არ მთავრდება, გამძლეობის ჭიდილია. თავი არ უნდა მოვიტყუოთ და გავაგრძელოთ შიგნით და გარეთ მუშაობა. მუშაობა მარტო ტელევიზიით არ გამოვა. უნდა გავიშალოთ და ვილაპარაკოთ ყველამ, ვილაპარაკოთ, მოვუსმინოთ ერთმანეთს და ვიმოქმედოთ. სინამდვილეში ძალიან ბევრნი ვართ, უბრალოდ გვყოფენ და გვაჩხუბებენ. ბევრად მეტნი ვართ", — წერს ის.

ქართული ოცნება და ოპოზიცია ისევ ვერ შეთანხმდნენ. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს.

დანიელსონის მედიაციით მხარეებს შორის შეხვედრა 17:00 საათზე დაიწყო. ის საქართველოში მეორედ 27 მარტს ჩამოვიდა. 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო 29 მარტს პოლიტიკურ პარტიებს ინდივიდუალურ ფორმატში შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.