ევროპული საბჭოს პრეზიდენტის, შარლ მიშეილის წარმომადგენელი, კრისტიან დანიელსონი ხელისუფლებასა და ოპოზიციას შორის მორიგი წარამეტებელი მედიაციის შემდეგ საქართველოს მოქალაქეებს მიმართავს და ამბობს, რომ მათ იმედგაცრუებას სრულიად იზიარებს,

"მინდა მივმართო საქართველოს ყველა მოქალაქეს. ვიცი, რამდენად ელოდებოდით შეთანხმების მიღწევას და სრულიად ვიზიარებ თქვენს ფრუსტრაციას. მაგრამ, ამასთანავე მე მივესალმები ყველა ძალისხმებას, რომელიც პროცესის მსვლელობის დროს იყო.

არასამთავრობო ორგანიზაციებმა ძალიან სასარგებლო წინადადებები შემოიტანეს და ასევე, მედიამ ძალიან მაღალი დონე აჩვენა ამ პროცესის გაშუქებაში, რაც პოლიტიკურ ლიდერებს ანგარიშვალდებულს ხდიდა. ასეთი ძლიერი სამოქალაქო საზოგადოება, რომელიც საქართველოშია, ერთ დღეს მოახერხებს, რომ ეს ფურცელი გადაშალოს და თავისი ამბიციური მომავლისკენ წინ წავიდეს. რა თქმა უნდა, ევროკავშირი კვლავ მზად არის, რომ დაეხმაროს საქართველოს ყველა ნაბიჯში ამ გზაზე", — განაცხადა დანიელსონმა.

ქართული ოცნება და ოპოზიცია ისევ ვერ შეთანხმდნენ. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს.

დანიელსონის მედიაციით მხარეებს შორის შეხვედრა 17:00 საათზე დაიწყო. ის საქართველოში მეორედ 27 მარტს ჩამოვიდა. 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო 29 მარტს პოლიტიკურ პარტიებს ინდივიდუალურ ფორმატში შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

გაიგეთ მეტი:

რა ეწერა დოკუმენტში, რომელსაც მხარეებმა ხელი არ მოაწერეს