ხელისუფლებასა და ოპოზიციას შორის მორიგი წარუმატებელი მედიაციის შემდეგ კრისტიან დანიესლონმა განაცხადა, რომ ის მოლაპარაკებების მიმდინარეობის შესახებ ევროპული საბჭოს პრეზიდენტ შარლ მიშელს ანგარიშს ჩააბარებს და ის გადაწყვეტს, რა იქნება შემდეგი ნაბიჯი და როდის იქნება ისინი გადადგმული.

"სამწუხაროდ, მოლაპარაკების მაგიდასთან არ ყოფილა ისეთი მზაობა რომ მიღწეული ყოფილიყო კომპრომისი. მე მოვახსენებ პრეზიდენტ მიშელს, რა ხდებოდა კვირის განმავლობაში და იგი გადაწყვეტს, რა იქნება შემდეგი ნაბიჯი და როდის იქნება ისინი გადადგმული", — განაცხადა კრისტიან დანიელსონმა.

ქართული ოცნება და ოპოზიცია ისევ ვერ შეთანხმდნენ. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს.

დანიელსონის მედიაციით მხარეებს შორის შეხვედრა 17:00 საათზე დაიწყო. ის საქართველოში მეორედ 27 მარტს ჩამოვიდა. 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო 29 მარტს პოლიტიკურ პარტიებს ინდივიდუალურ ფორმატში შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

გაიგეთ მეტი:

რა ეწერა დოკუმენტში, რომელსაც მხარეებმა ხელი არ მოაწერეს