პარტია მოქალაქეების ლიდერის ალეკო ელისაშვილის თქმით, საქართველოში არსებული პოლიტიკური კრიზისის გადაჭრის შანსი ახლა არსებობს და დღეს გამოჩნდება, ვის უყვარს ეს ქვეყანა. მისივე თქმით, კრიზისის გადაწყვეტის პასუხისმგებლობა ორივე მხარეს აქვს.

"შეთანხმება არის საჭირო. ეს კრიზისი იწილო-ბიწოლოს და ბასტი-ბუბუს დაემსგავსა, სადაც გაჯიუტებული ბავშვები რაღაც თავისას არ თმობენ, ჰოდა ამასობაში კიდევ უფრო გაღარიბდა, გაღატაკდა ეს ქვეყანა. ვინმეს თუ უნდა ქვეყანასა და ხალხზე ვიფიქროთ, დღეს არის ის შესაძლებლობა და შანსი, რომელიც ხელიდან არ უნდა გაუშვას არავინ. დღეს გამოჩნდება ვის უყვარს ქვეყანა და ვის არა. კრიზისის გადაწყვეტაზე პასუხიმგებლობა ორივე მხარეს აქვს. უხერხულია უბრალოდ ქვეყნის წინაშე და ჩვენი ქვეყნის მეგობრების წინაშე, ხალხის წინაშეა სირცხვილი. დანიელსონს კი არ სჭირდება შეთანხმება, შეთანმხება სჭირდება ხალხს", — თქვა ელისაშვილმა.

ევროპული საბჭოს პრეზიდენტის, შარლ მიშელის წარმომადგენელი, კრისტიან დანიელსონი მხარეებთან მოლაპარაკებებს მართავს. პირველი უშედეგო მედიაციის შემდეგ საქართველოში ის 27 მარტს დაბრუნდა.

შვედი დიპლომატი 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს შეხვდა, პოლიტიკურ პარტიებს კი, 29 მარტს. შეხვედრის შემდეგ მან განაცხადა, რომ 30 მარტს, ქართულ ოცნებასა და ოპოზიციას შორის დაგეგმილ საერთო შეხვედრაზე წარადგენს დოკუმენტს, რომელსაც შეთანხმების შემთხვევაში მხარეებმა ხელი უნდა მოაწერონ.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.