ევროპული საბჭოს პრეზიდენტ შარლ მიშელის წარმომადგენელთან, კრისტიან დანიელსონთან ქართული ოცნებისა და ოპოზიციის შეხვედრა 1 საათით გადაიდო. ამის შესახებ ინფორმაცია ადგილზე მყოფმა გირჩი — მეტი თავისუფლების ლიდერმა, ზურაბ ჯაფარიძემ ჟურნალისტებს განუცხადა. მიზეზი, ჯერ-ჯერობით, უცნობია.

ჯაფარიძემ, ასევე, ისაუბრა პროგნოზზე, რომელიც მას აქვს იმ შემთხვევაში, თუ მოლაპარაკება ვერ შედგება. მისი განცხადებით, მთელი ამ სიტუაციის "ტრაგიკულობა" იმაშია, რომ ისინი სრულ გაუგებრობაში არიან, ამიტომ ვერ შეძლებს რომელიმე პარტია გათვალოს, რას იზამენ ერთ ან ორ თვეში.

"პოლიტიკური კრიზისი წარმოშობს ბევრ გაურკვევლობას, რომელიც მერე ითარგმნება ბევრ სხვადასხვა კრიზისში. მათ შორის, ჩვენ გვაქვს ეკონომოკური კრიზისი, რომელიც კიდევ უფრო გაღრმავდება ამის შედეგად. ერთადერთი, რა პროგნოზის გაკეთებაც შეიძლება, ზოგადად, არის ის, რომ ჩვენ დავრჩებით გაურკვევლობაში და ამას მოჰყვება ბევრი ცუდი რაღაც. ამის თქმა შემიძლია.

დანარჩენი ვერავინ ვერაფერს ვერ გათვლის ამ ქვეყანაში. როგორც ბიზნესს არ შეუძლია გათვალოს 6 თვეში რას გააკეთებს, იმიტომ, რომ კაცმა არ იცის ქვეყანაში რა მოხდება, ესე არ შეიძლება რომელიმე პოლიტიკურმა პარტიამ გათვალოს, რომ 1 თვეში ამას ვიზამ, ორ თვეში ამას ვიზამ", — თქვა მან.

დანიელსონის მედიაციით მხარეებს შორის შეხვედრა დღეს 16:00 საათზე იყო დაგეგმილი. მანამდე ის საქართველოს პრეზიდენტს, სალომე ზურაბიშვილს შეხვდა თუმცა შეხვედრის შესახებ პრეზიდენტის ადმინისტრაციას წინასწარ ინფორმაცია არ გაუვრცელებია. ამასთან, შეხვედრის დასრულების შემდეგ, მათ არ გაავრცელეს არც ფოტოები და არც ვიდეო.

დანიელსონი საქართველოში მეორედ 27 მარტს ჩამოვიდა. ის 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო პოლიტიკურ პარტიებს 29 მარტს შეხვდა. შეხვედრის შემდეგ მან განაცხადა, რომ 30 მარტს, ქართულ ოცნებასა და ოპოზიციას შორის დაგეგმილ საერთო შეხვედრაზე წარადგენს დოკუმენტს, რომელსაც შეთანხმების შემთხვევაში მხარეებმა ხელი უნდა მოაწერონ.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.