გირჩი — მეტი თავისუფლების ლიდერის, ზურაბ ჯაფარიძის განცხადებით, ევროპული საბჭოს პრეზიდენტის წარმომადგენელი, კრისტიან დანიელსონი აპირებს, რომ 30 მარტს მაგიდაზე დადოს კონკრეტული ტექსტი, რომელიც არ დაექვემდებარება დისკუსიას.

"ისინი აპირებენ, რომ დადონ კონკრეტული ტექსტი, რომელიც უკვე აღარ ექვემდებარება დისკუსიას, შესაბამისად ვინც დათანხმდება, დათანხმდება, ვინც არ დათანხმდება, არ დათანხმდება. შესაბამისად, ჩემი დამოკიდებულება არის სწორედ ის, რაც საჯაროდ დავწერე. მე მგონია, რომ ამ შემთხვევაში ჩვენი მეგობრების პოზიცია პრინციპულად განსხვავებული უნდა იყოს იმისგან, რაც გვესმოდა მთელი ამ პერიოდის განმავლობაში, სადაც ისინი ორივე მხარეს მოუწოდებდნენ კომპრომისისკენ და ორივე მხარეს ეუბნებოდნენ, რომ თქვენზეა პასუხისმგებლობა და პოლიტიკურ ლიდერებზეა პასუხისმგებლობა. კი, ცხადია, პასუხისმგებლობა არის, თუმცა პასუხისმგებლობა საბოლოო ჯამში დადის რაღაც კონკრეტულ თემებზე. ეს თემები არის გაწერილი შარლ მიშელის 5 პუნქტში და იმ 5-ვე პუნქტში ამ წუთში პასუხისმგებელი არის ხელისუფლება", — განაცხადა ჯაფარიძემ ფორმულას ეთერში.

ევროპული საბჭოს პრეზიდენტის, შარლ მიშელის წარმომადგენელი, კრისტიან დანიელსონი საქართველოში მეორედ 27 მარტს ჩამოვიდა. ის 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს შეხვდა. მიშელის წარმომადგენელი პოლიტიკურ პარტიებს დღეს, 29 მარტს შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.