პრემიერმინისტრის, ირაკლი ღარიბაშვილის განცხადებით, ევროპარლამენტარის ანდრიუს კუბილიუსის განცხადება მოლაპარაკებებში "არაფორმალური ლიდერების" ჩართვის შესახებ "შეურაცხმყოფელია".

"ეს არის შეურაცხმყოფელი განცხადება, მე ასე ვიტყოდი. ბატონი ბიძინა ივანიშვილი პოლიტიკიდან წავიდა. მან დატოვა პოლიტიკური თანამდებობა, შემდეგ პარტიის თავმჯდომარეობის პოსტი და ღიად განაცხადა, რომ აღარ მონაწილეობას, აღარც აპირებს პოლიტიკაში ჩართვას. ეს არის მარტივი ჭეშმარიტება.

მეორე, რაც შეეხება სააკაშვილის შესაძლო ჩართულობას, ეს არის შეურაცხმყოფელი ჩვენი ქვეყნის, ჩვენი სახელმწიფოსთვის, რომ ვიღაც — ვინც არ უნდა იყოს, არ მაინტერესებს აბსოლუტურად — მოგვიწოდებდეს ჩვენ, რომ ეს კრიმინალი, არაერთ მძიმე დანაშაულში მხილებული და მისჯილი პიროვნება იქნას ფორმალურად ჩართული რაიმე ფორმით ამ მოლაპარაკებაში", — თქვა ღარიბაშვილმა.

ევროპარლამენტარი ანდრიუს კუბილიუსი ქართულ ოცნებასა და ოპოზიციას შორის მოლაპარაკების პროცესში არაფორმალური ლიდერების ჩართვის იდეით 25 მარტს გამოვიდა. მისი თქმით, ფორმალურ ლიდერებს, რომლებსაც მონაწილეობენ მოლაპარაკებებში "არ ესმით თავიანთი პასუხისმგებლობა, ვერ პოულობენ კომპრომისს". სწორედ ამიტომ ჩათვალა საჭიროდ ევროპარლამენტარმა, მოლაპარაკებებში ჩართულიყვნენ ადამიანები, რომლებიც ფორმალურად არა, მაგრამ "პოლიტიკური და ფსიქოლოგიური თვალსაზრისით კვლავ ლიდერები არიან".