გრაფიტის ცნობილმა მხატვარმა ბენქსიმ ნახატი აუქციონზე 23 მილიონ დოლარად გაყიდა და შემოსული თანხა სრულად გადაურიცხა საუზ ჰემპტონის საუინივერსიტეტო კლინიკას. არტისტმა ნამუშევარი გასული წლის მაისში შექმნა და პანდემიისას დაუღალავად მშრომელ სამედიცინო პერსონალს მიუძღვნა. ამ ღირებულებით ბენქსიმ თავისი წინა რეკორდი გააორმაგა.

ნახატზე, სახელად Game Changer, გამოსახულია პატარა ბიჭი, რომელიც მედდის უნიფორმიანი ფიგურით თამაშობს: ექიმს პირბადესთან ერთად სუპერგმირის მოსასხამიც აქვს.

ნახატზე ასევე ჩანს კალათაში ჩაყრილი კომიქსის ცნობილი სუპერგმირების თოჯინები — ბეტმენი და ადამიანი-ობობა. როგორც ჩანს, მოზარდი ახალი გმირით უფრო მეტადაა დაინტერესებული.

ეს ერთი მეტრის დიამეტრის ნახატი ბენქსიმ ინგლისის ერთ-ერთ კლინიკას გადასცა:

"მადლობა ყველაფრისთვის. იმედია, გარემოს მცირედით მაინც გაგიფერადებთ, მიუხედავად იმისა, რომ ის შავ-თეთრია".

როგორც თავიდანვე იყო ჩაფიქრებული, ნახატი საავადმყოფოში დროებით იყო განთავსებული, შემდეგ კი აუქციონზე გაიყიდა.

ეს პირველი ნახატი არ არის, რომელიც ამ ანონიმურმა ბრიტანელმა ხელოვანმა პანდემიის დროს შექმნა.

ამავე თემაზე: